Beatu Carlo Acutis halo milagre, Vatikanu deside foinsa’e mileniál ne’e atu sai santu
DILI, 25 maiu 2023 (TATOL)–Foinsa’e Carlo Acutis ne’ebé moris iha London, Inggris, iha áarea Britániku, 03 maiu 1991, ne’ebé mate tanba sofre moras Leukemia ho otas 15 ne’e sei sai santu husi foinsa’ e mileniál dahuluk, hafoin vatikanu anúnsia katak Beatu Carlo Acutis halo milgare ba dala-rua ona, nune’e nia merese ketan kanonizasaun.
Beatu Carlo Acutis nu’ udar foinsa’e ida-ne’ebé peritu ba komputadór ne’e tulun haklaken Maromak nia liafuan ka dutrina relijiaun Katólika Romanu liuhusi “online” antes nia mate iha 12 outubru 2006.
Papa Francisco deside katak milagre daruak ne’ebé akontese hafoin Baetu Carlo Acutis nia mate ne’ e lejitimu, no ho nune’e foinsa’e milneial ne’ebé sai “Mahein Ba Intenrnet” ne’e merese atu hetan kanonizasaun sai santu.
Anúnsiu ne’e formalmente vatikanu fó sai iha loron kinta (23 maiu 2024), bainhira Papa Francisco halo audiensia ho Kardeál Marcello Sameraro ne’ebé toma konta ba perfeitu anunsiasaun ba santu.
To’o daudaun ne’e, Papa Francisco halo ona kanonizasaun ba ema hamutuk 912. Iha dutrina Katólika nian, ema bele reza ba ema-ne’ebé mate tiha ona—ne’e sira fiar katak iha ona lalehan—husu atu sira bele ko’alia ho Maromak hodi ninia naran ka sai Intermediáriu, ezemplu husu atu nune’e moras ne’ebé nia enfrenta bele hetan kura.
Bainhira ema-ne’ebé reza ka halo devosaun ne’e ninia moras hetan kura—mak ho ida-ne’e vatikanu konsidera hanesan milagre ida ka “priviléjiu” ida-ne’ebé iha ema-ne’ebé mate tiha ona ne’e. Bainhira iha ona milagre rua (2) ne’ebé akontese no prova katak loos—hafoin liu tiha halo inspesaun ba orijinalidade istoria ne’e—mak ema-ne’ebé mate tiha ona ne’e submetidu hanesan ema santu.
Beatu Carlo Acutis rejistadu hanesan kandidatu sai ema santu hafoin Papa Francisco fó karimbu validu (stempel sah) ba istória milagre nian ida-ne’ebé iha ligasaun kona-ba nia.
Beatu Carlo Acutis halo milagre
Istória kona-ba labarik ida ho idade tinan hitu (7) husi Brazil hetan di’ak husi nia moras Pánkreas, hafoin hetan kontaktu ho Carlo Acutis nia kamiza (kaos T-shirt) ida no pastor (pendeta) ida mós reza ka halo devosaun ba Carlo Acutis hodi labarik ne’e nia naran.
Unidade ida iha iha Igreja Katólika nian ne’ebé espesiál haree tuir istória sira kona-ba milagre no buka-tuir ninia verasidade (lia-loos) ne’eb’e hanaran Medical Council of the Congregation for Saints’ Causes, iha biban ne’e investiga hela klaim/alega ida husi feto foinsa’e ida husi Kosta Rika ne’ebé hetan di’ak husi nia moras ho maravilloza hafoin enfrenta asidente grave bainhira lori bisikleta iha Florence, Italia, iha tinan 2022.
Feto foinsa’e husi Kosta Rika, Valeria Valverde, idade 21, hala’ o operasaun craniotomy atu hamenus presaun iha ninia kakutak no ninia inan-aman hatten katak ninia oan feto ne’e iha kondisaun moras krítiku.
Hafoin ne’e, ninia inan reza ba Valeria Valverde, ninia rekuperasaun (husi moras) iha Beatu Carlo Acutis nia rate iha sidade kiik-oan ida naran Assisi iha área Umbria, Italia.
Parte igreja hateten katak iha loron ne’ebé hanesan, Valeria Valverde hahú dada iis fali lahó apoiu husi ventiladór no bele book ninia isin parte leten ne’e no bele ko’alia fali. Hafoin loron 10, nia bele alta husi sala emerjénsia (ICU) no rezultadu ezame médiku hatudu katak moras iha ninia kakutak ne’e hetan kura.
Antes ne’e, Beatu Carlo Acutis nia inan, Antónia Salzano hateten ba jornál Corriere della Sera katak bainhira nia oan iha idade tinan tolu (3), nia husu beibeik ba nia atu hala’o vizita ba igreja sira-ne’ebé iha Milano no oferta osan ba ema ki’ak sira iha Milano.
Antónia Salzano mós hateten, ninia oan haksolok tebes fó tulun ba ninia belun sira-ne’ebé ninia inan-aman fahe malu (divorsiuadu), defende ninia kolega sira-ne’ebé moris hanesan ema ho defisiénsia bainhira hetan asédiu morál, fó hahan ba ema tunawisma (morador de rua) iha Milano.
Bainhira sei eskola iha ensinu báziku, Carlo Acutis otodidakmente aprende mesa-mesak oinsá métodu CODING no hafoin ida-ne’e halo portal (website) ba organizasaun sira Katólika nian, inklui portal id- ne’ebé halibur istória maraviloza sira husi sarani Katólika iha mundu no halo dokumentasaun.
Biografia BEATO CARLO ACUTIS
“Hakarak sai santu la’ós buat dook ida maibé buat besik ida tanba Maromak besik ba ema hotu”
Beato Carlo Acutis moris iha London, Inggris, iha area Britániku, 03 maiu 1991. Hafoin Carlo Acutis moris halo fulan hira de’it, nia família deside hodi muda ba Milano-Italia. Nia aman naran Andrea Acutis no nia inan naran Antónia Salzano.
Carlos Acutis mate iha 12 outubru 2006, tanba hetan moras Leukimia, no hakoi iha semitériu Asisi tamba nia rasik mak husu iha ne’ebe nia iha domin boot tebes ba Santu Francisco husi Asisi.
Ninia moris joven nian, nia oferese ba Maromak. Ninia moras ne’ebé nia enfrenta ne’e nia hato’o ba maktoban Papa Bento XVI hodi dehan nune’e; “Ha’u oferese ha’u-nia terus ida-ne’e ba Maromak, ba amu papa no ba Igreja”.
Carlo Acutis husik Mundu ida-ne’e ho ninia idade 15. Ninia moris tomak hatudu katak nia hanesan pesoál ida-ne’ebé mak fo ninia-aan tomak hodi obedese ba Nai Maromak liuhusi ninia adorasaun no devosaun sira ba Eukaristia Santu.
Iha sosiedade nia matan, Carlo Acutis konêsidu nu’udar foinsa’e ka joven ida-ne’ebé mak sempre ativu iha atividade liturjia Eukaristia loro-loron nian. Tuir nia katak Eukaristia deit mak sai nudar dalan ida-ne’ebe loos hodi lori ema ba lalehan.
Nu’udar foinsa’e, admira ho Beatu Carlo Acutis nia moris tanba iha ne’ebé tempu ba nia hodi simu Eukaristia Santa (primeiru komuňaun) no hahú husi tempu ne’eba kedas, Nai Maromak rasik transfroma ona nia, iha ne’ebé nia rasik deside hodi la falta misa iha loro-loron, hala’o konfesa iha loron domingu-domingu, no nia uza tersu sai hanesan salvasaun ba nia aan, tamba nia reza tersu loro-loron iha nia moris tomak.
Ho espiritualidade sabédoria ne’ebé nia iha, ho iha ne’ebé nia sei kiik, nia husu ba nia inan-aman atu lori nia vizita fatin peregrinasaun sira hotu iha Italia laran. No, ninia intensaun ne’e realiza duni no sira halo peregrinasaun ba iha fatin sira-ne’e mak hanesan fatin santu sira nian no fatin ba sitiu milagrozu sira.
Testemuňa úniku rua ne’ebe mak hatudu husi Carlo Acutis bainhira nia sei moris, iha ne’ebé nia lala’ok moris lori duni nia família hakbesik aan ba Maromak liu-husi badinas misa loro-loron. No, ida tan, nia halibur no motiva nia belun sira hotu hodi partisipa misa loro-loron no hodi simu komuňaun.
Beato Carlo Acutis mos iha ninia matenek ida ne’ebe mak ita bele dehan úniku tebes iha area komputadór (IT) no nia rasik sai hanesan Programmer. Tamba ho ida-ne’e, Beato Carlo Acutis ho koñesidu ema hanaran no hili nian sai hanesan mahein ba Cyber no IT ka mahein ba internet. Husi ne’e, atu hateten katak bainhira ita iha problema ruma kona ba Cyber no IT nian mak ita sei bele husu apoiu orasaun husi Beato Carlo Acutis.
Carlo Acutis rasik realiza duni ninia matenek ne’ebé nia iha hodi kria situs ou line ida-ne’ebé mak iha kontestu Igreja nian ema hanaran Katalogus Milagre ba Eukaristia. No, asaun ida-ne’e mak halo nia famozu iha kontestu moris vida spirituál nian, atu fó hanoin mós mai ita hodi kontinua uza Internet sai hanesan fatin komunikasaun espirituál nian liuliu hodi haklaken Maromak Nia Futar Lia-fuan liuhusi fiar ne’ebe ita iha, atu nune’e bele transforma mundu ida-ne’e bele la’o iha dalan ne’ebe mak loos.
Ho ninia sabédoria espiritualidade ne’ebé boot, ou lala’ok moris Carlo Acutis nian ne’ebé hatudu ona, mak ninia prosesu hodi sai ema santu ne’e mos akontece ho lais iha ne’ebé hanesan iha tinan 2013 nia hetan titulu “Reverendisimu”.
Iha 18 outubru 2018, nia hetan tan titulu hanesan ema-ne’ebé mak hetan “bensaun” duni husi Maromak. Iha outubru 2020, nia hetan beatifiksaun totál husi Igreja Ratólika Romanu nian iha Basílika Santo Francisco Asisi, Italia husi Cardinal Agostino Vallini, no nia loron selebrasaun mak iha loron 12 outubru tuir kalendáriu liturjia Igreja.
Ho titúlu Beatu ne’ebe mak hetan ona husi Carlo Acutis hakarak konvida ita hotu hodi partsisipa iha moris vida espirituál nian ho di’ak, hanesan nia rasik dehan: “Hakarak sai santu la’ós buat dook ida, maibé buat besik ida iha ema hotu nia leet no ema hotu sei to’o ba, tanba Maromak besik ba ema hotu”.
TATOLI
