DNMG sei instala ekipamentu previzaun klima kada munisípiu
BAUCAU, 27 maiu 2024 (TATOLI) – Diresaun Nasionál Meteorolojia Geofizika (DNMG) planeia sei instala ekipamentu kona-ba previzaun klima iha kada munisípiu iha territóriu nasionál.
Diretór Nasionál Meteorolojia Geofizika, Terenso Fernandez Monis, esplika, ekipamentu referida hanaran automatic wades station nune’e munisípiu sira hatene antes instala iba territóriu nasionál.
“Ami mai fó informasaun kona-ba atu monta ekipamentu automátiku iha munisípiu sira ba Autoridade,” Diretór Nasionál Meteorolojia Geofizika hateten iha Sentru Konvensaun Baucau (CCB, sigla portugés), segunda ne’e.
Ekipamentu automatic wades station parte DNMG halo ona kompra ho objetivu fo-sai previzaun hanesan parametru udan-been, velosidade anin ho nia diresaun, temperatura másimu no mínimu inklui mos presaun aar nian.
DNMG planeia kada munisípiu sei instala ekipamentu referida mais modernu liu hodi subtitui ekipamentu anteriór ne’ebé sei manuál nune’e fasilita hodi halo previzaun iklima inklui sei anunsia ba públiku kada loron.
“Atu monta automátika iha tinan-ne’e, ne’e bele fasilita ona DNMG fó informasaun di’akliu ho responsabilidade,” Terenso Moniz akresenta.
Gastu orsamentu hodi sosa ekipamentu automatic wades station referida hamutuk milaun $21 husi fundu klimátikaa verde ne’ebé aloka husi kada liña ministeriál inklui husi DNMG.
Terenso Moniz, husu Autoridade Suku sira atu kolobora nune’e hafasil ekipa tékniku sira bainhira halo ona servisu iha terrenu tanba tuir planu projeitu referida sei implementa iha meadu tinan-2024.
Jornalista : Natalino Belo
Editór : Evaristo Soares Martins
