HEADLINE, SEGURANSA

Tribunál interroga dahuluk ba arguidu na’in-hitu no promove krime rouba

Tribunál interroga dahuluk ba arguidu na’in-hitu no promove krime rouba

Tribunal Distritál Dili

DILI, 27 maiu 2024 (TATOLI) – Tribunál Judisiál Primeira Instánsia Dili (TJPI), kontinua halo interrogatóriu dahuluk ba arguidu na’in hitu ne’ebé envolve iha kazu furtu agravadu ne’ebé mak akontese iha Prai dos Coqueiros no Ministériu Púbiku promove arguidu sira ho krime rouba ne’ebé previstu 157 no krime omesídiu simples ne’ebé previstu iha artigu 138 hosi Kódigu Penál Timor-Leste.

Iha prosesu interrogatóriu dahuluk, despaisu ikus Tribunál nian, deside aplika medida koasaun Prizaun Preventiva ba arguidu ho inisiál R tanba iha faze interrogatóriu prova hatudu katak arguidu mak envolve diretamente ba kazu ida-ne’e.

Maibé arguidu ho inisiál J hosi parte Defeza hato’o rekerimentu ba Tribunál tanba razaun sei minoridade, entaun Tribunál entende ida-ne’e hodi liberta kedan arguidu.

Enkuantu, arguidu na’in lima seluk, Tribunál aplika de’it medida koasaun aprezentasaun períodika ba arguidu sira aprezenta aan iha Ministériu Públiku, semana ida dala ida.

Razaun Tribunál aplika medida Aprezentasaun Períodika ba arguidu na’in-lima tanba prosesu interrogatóriu iha Tribunál prova la hatudu katak arguidu sira mak envolve diretamente ba kazu ne’ebé maka akontese foin daudaun ne’e.

Defeza hosi arguidu na’in-hitu, Defensór Públiku, Estaqui Guterres hateten, Tribunál hatún despaisu ikus ba arguidu na’in-hitu ne’ebé envolve kazu hadau telefone iha Dili, iha medida ne’e Tribunál aplika Prizaun Preventiva ba arguidu na’in-ida ho inisiál R no argidu na’in-ida seluk ho inisiál J mak Tribunál deside liberta, iha arguidu na’in-lima Tribunál deside aplika medida koasaun Aprezentasaun Períodika.

“Arguidu na’in-lima ne’e Tribunál aplika medida koasaun Aprezentasaun Períodika, tanba la envolve iha kazu ne’ebé akontese iha kazu foin daudaun ne’e. Só iha arguidu na’in-rua mak envolve iha kazu ne’e, ida ho inisiál R mak faktu provadu katak nia envolve duni kazu ida foin daudaun ne’e no Tribunál deside aplika Prizaun Preventiva enkuantu arguidu ida seluk ho inisiál J tanba nia sei minoridade, entaun Tribunál dekreta hodi liberta kedan arguidu ida-ne’e”, Estaqui Guterres hateten ba jornalista iha TJPID, segunda ne’e.

Estaqui dehan, iha prosesu interrogatóriu, Ministériu Públiku hakarak Prizaun Preventiva ba arguidu na’in-hitu maibé hanesan parte defeza hosi arguidu sira, husu ba Tribunál katak aplika medida koasaun ne’ebé adekuada liu mak aprezentasaun períodika.

“Maibé por razaun hosi Tribunál nian haree ba prova sira ne’e, Tribunál deside tuir saida mak prova sira iha, enkuantu ba arguidu na’in-lima seluk, kazu ne’e seidauk remata prosesu investigasaun sei kontinua lao, Ministériu Públiku hanesan na’in ba prosesu penál nia mak sei koordena ho Polísia halo investigasaun klean liu katak arguidu na’in-lima ne’e envolve diretamente ka lae. Maibé tuir prova ne’ebé arguidu sira aprezenta iha interrogatóriu dahuluk ne’e hatudu katak arguidu na’in-lima la envolve direta ba akontesimentu ne’ebé akontese foin dadaun ne’e”, nia adianta.

Advogadu José Guterres hateten, Tribunál deside liberta tiha arguidu ida tanba nia tinan seidauk to’o atu tuir julgamentu iha Tribunál komum.

Tuir Kódigu Penál, artigu 120 kona-ba impunibilidade katak labarik sira ne’ebé ho idade minor labele halo julgamentu ba nia no tenke liberta nia hosi krime ne’ebé imputa ba nia.

“Sé aban bainrua mak ita iha Tribunál Juvenil mak bele haree sira maibé Tribunál komum hanesan agora daudaun ne’e labele halo julgamentu ba nia tanba ita nian Kódigu Penál mós la admite atu halo julgamentu ba minoridade bainhira envolve iha krime”, nia konklui.

Notísia relevante : MP alega prizaun preventiva ba arguidu nain-hitu ne’ebé hadau telefone hodi hamate Nituchia Fangidae

Jornalista: Natalino Costa    

Editór : Zezito Silva

iklan
iklan

Leave a Reply

iklan
error: Content is protected !!