HEADLINE, KAPITÁL

Uma-kain neen iha Bidau Santa-Ana hetan ona apoiu sosiál

Uma-kain neen iha Bidau Santa-Ana hetan ona apoiu sosiál

Abitante afetadu despeju administrativu, Amélia dos Santos, hamutuk ho ninia membru família kontinua hela iha lona okos iha tasi-ibun Bidau Santa-Ana, kuarta (08/05/2024). Imajen Tatoli/Arminda Fonseca

DILI, 28 maiu 2024 (TATOLI)—Uma-kain neen (husi uma-kain 40) ne’ebé antes ne’e hetan despeju administrativu iha Bidau Santa-Ana iha loron 18 abríl 2024 husi ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU), hetan ona apoiu sosiál husi Sentru Solidaridade Sosiál no Inkluzaun munisípiu Dili.

“Durante ami hela iha ne’e fulan-ida resin ona foin lalais mak husi Sentru Solidaridade Sosiál no Inkluzaun Munisípiu Dili lori foos karon neen mai fó ami uma-kain neen ne’ebé hela iha tasi-ibun ne’e, sira fó de’it mak foos laiha hahán seluk ruma,” Afetadu despeju, Amélia dos Santos, informa ba Agência Tatoli, iha tasi-ibun, Bidau Santa-Ana, tersa ne’e.

Nia dehan, daudaun sira presiza liu mak hela-fatin tanba daudaun família afetadu despeju kontinua nafatin hela iha tasi-ibun.

“Ami hakarak sai maibé hela iha ne’e desde tinan-1980 mak ekipa mai sobu de’it ita-nia fatin, atu bá foho lori saida halo uma, ne’ebé ami kontinua hela to’o Governu fó solusaun ruma mak ami sai,” nia akresenta.

Notísia relevante : Ekipa SEATOU sobu uma no barraka 40 iha Bidau Santa-Ana

Iha fatin hanesan, Xefe suku Bidau Santa-Ana, Alexandrino Mesquita da Costa Bras, sente triste nu’udar líder komunitáriu tanba komunidade balun to’o agora kontinua hela iha tasi-ibun Bidau Santa Ana.

“Segunda semana kotuk parte husi Ministériu Obra Públika mai dehan Primeiru-Ministru Xanana mak haruka urjentemente atu foti vítima sira-nia dadus loron-rua de’it, segunda to’o tersa tenke foti ona atu hetan buat ruma, entaun ha’u rasik hamutuk ho komunidade prepara tiha dadus maibé to’o agora laiha ema ruma mak telefone ha’u ka mai foti dadus,” nia tenik.

Nune’e, nia husu MOP rekolla dadus afetadu despeju administrativu hamutuk 40-resin nune’e be;e fó apoiu ruma.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!