iklan

HEADLINE, SEGURANSA

Konsellu Ministru aprova dekretu-lei estatutu profisionál no pesoál PNTL

Konsellu Ministru aprova dekretu-lei estatutu profisionál no pesoál PNTL

Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, prezide reuniaun Konsellu Ministru, iha Palásiu Governu, kuarta (29/05/2024). Imajen Tatoli/Francisco Sony

DILI, 29 maiu 2024 (TATOLI)– Governu liuhusi reuniaun Konsellu Ministru, kuarta ne’e,  iha Palásiu Governu Dili aprova  projetu revizaun ba Dekretu-Lei númeru 69/2022, 28 setembru, ne’ebé ko’alia kona-ba estatutu profisionál no pesoál Polísia Nasionál Timor-Leste (PNTL).
Dekretu-Lei ne’e aprezenta husi Ministru Interiór, Francisco da Costa Guterres ho objetivu atu estabelese Estatutu foun Polisiál nian husi Polísia Nasionál Timor-Leste (PNTL).

Notisia relevante:MI submete ona revizaun estatutu profisionál no pessoál PNTL ba PCM 

“Polísia sira-nia estatutu foun ida-ne’e ho objetivu atu hadi’a regulamentu atuál, ho introdusaun mudansa signifikativa sira, maka hanesan introdús fila-fali juramentu fidelidade, define inkompatibilidade no kritériu objetivu sira ba promosaun,” tenik iha nota ne’ebé Agência TATOLI asesu husi media gabinete Primeiru-Ministru.

Dekretu-lei ne’e atu estabelese mós postu foun lideransa nian iha PNTL atu hatán ba nesesidade organizasionál.

Diploma ida-ne’e reflete importánsia atu garante polísia nasionál ida ne’ebé profisionál, bein treinada no estruturada, ho objetivu atu hametin Estadu Direitu no promove demokrasia iha territóriu nasionál.

Dekretu-Lei ne’e mós atu dignifika no valoriza membru PNTL sira tanba sira fó ona nia dedikasaun durante tinan barak atu servi institusaun no povu ida-ne’e, nune’e trata sira ho digñu.

Alende ne’e, aprova mós projetu Dekretu-Lei ida, ne’ebé aprezenta mós husi Ministru Interiór, ho intensaun atu estabelese Orgánika Foun PNTL nian, ho objetivu atu reestrutura no moderniza instituisaun ne’e,  hodi nune’e hasa’e ninia kapasidade resposta ba dezafiu nasionál ohin loron nian, ne’ebé aliña ho planu estratéjiku dezenvolvimentu no seguransa nasionál.

Hahú kedas iha tinan 2000 to’o ohin, Komandu Polísia Nasionál Timor-Leste (PNTL) hala’o nia kna’ar tuir Konstituisaun artigu 147 katak polísia defende legalidade demokrátika no garante seguransa interna ba sidadaun hotu no la inklina ba kualkér grupu polítiku. Prevensaun krime tenke bazeia ba respeitu direitu umanu no lei mak determina regra, regulamentu ba polísia no forsa seguransa no mós forsa sira seluk.

Notisia relevante: https://www.pntl.tl/wp-content/uploads/2015/07/ESTATUTO-PROFISSIONAL-DO-PESSOAL-COM.pdf

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!