DILI, 30 maiu 2024 (TATOLI)–Sarani arkidioseze Dili, kinta ne’e, hala’o prosisaun iha loron Solenidade Santíssimo Corpo e Sangue de Cristo husi igreja Balide to’o iha Lecidere ho reza tersu tutuir dalan.
Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten iha kamiñada ho Óstia ka Eukaristia Santa ne’e, ema hotu bele haree Nai Maromak nia grandeza, Maromak ida boot-liu maibé halo aan kiik-liu iha Óstia konsagrada ka Paun ida-nia laran, katak ida boot sai kiik no ki’ak.
“Iha-ne’e mak ita hetan forsa domin nian, iha solenidade Eukaristia, Jesus hanorin ida-ne’e ba ita, atu sai sinál unidade ninian hanesan ita sente iha loraik ida-ne’e. Haleu Eukaristia, haleu Kristu nia futar isin, ita sai ida de’it,” Dom Virgílio Kardeál do Carmo da Silva, SDB, hateten iha Celebração da Palavra, iha Lecidere.
Bispu dioseze Dili ne’e hateten, forsa ida tan mai husi Eukaristia mak Jesus sai forsa ida-ne’ebé hadomi ba ema-ne’ebé la’o sala, tanba Jesus Paun moris hanesan iha Evanjellu katak ho paun ida-ne’e mak Nia fó prémiu ida boot-liu..
Maske nia eskolante faan Nia, Jesus iha paixaun boot liu fó ba nia no hadomi nafatin hodi halo buat di’ak.
“Dalabarak ita ema sala na’in, maibé hanesan nia halo ba Judas, sadia, bainhira ita hakbesik aan atu simu Nia,” nia esplika.
Hanesan Amu Papa Francisco hateten; “Eukaristia la’ós ema Santu sira nian, maibé Paun ba ita ema sala na’in sira”. Bainhira sarani ida simu Paun moris nian, Jesus konvida sentidu foun ida ba moris iha ema-nia frajilidade.
“Ita boot liu iha Jesus nia matan, ida-ne’e mak Amu Papa fó ba iha vida Eukaristia ninian. Jesus hanorin ita atu hatene hadomi no tulun ba ema sira-ne’ebé presiza ita-nia tulun,” nia hateten.
Sarani sira halibur hamutuk iha tinan ida-ne’e hanesan tinan espesiál 2024, hodi solenidade ida-ne’e ho prosisaun katak Jesus Jesus sai objetu ida simples, objetu haraik aan, fahe no konvive Nia aan.
Dom Virgílio Kardeál esplika, Jesus la’ós fó nia isin hodi halakon hamlaha de’it, meibé silu no fahe fó Nia aan rasik ba nia eskolante sira, tan ne’e husi finalidade ida-ne’e mak saran-aan.
“Bainhira ita fó ita-nia aan mak ita foin serbí iha família komunidade relijozu no sosiedade. Serbí iha pás, unidade no armonia iha familia no sosiedade. Hanesan mós, ami amu-lulik sira saran aan mak ami bele fó ami-nia aan di’ak-liu hodi serbí Maromak hanesan Jesus,” nia dehan.
Iha porsisaun ne’e marka prezensa mos hosi Reprezentante Vatikanu iha Timor-Leste, Núnsiu Apóstolika Marco Sprizzi, Dom Virgílio Kardeal do Carmo da Silva, SDB, padre, relijiozu no relijioza, seminarista, akólitu, eskuteiru, estudante no sarani atus ba rihun.
Jornalista : Jesuína Xavier
Editór : Cancio Ximenes
