Tribunál aplika prizaun preventiva ba arguida FJF ne’ebé komete krime burla
DILI, 01 juñu 2024 (TATOLI)-Tribunál Judisiál Primeiru Instánsia Dili (TJPID), iha sábadu (01/6) ne’e, halo interrogatóriu dahuluk ba arguida FJF ne’ebé envolve iha krime burla agravadu ka lohi ema hatama osan hodi lori ba servisu iha Austrália.
Iha prosesu interrogatóriu dahuluk ne’e, Ministériu Públiku promove krime burla agravadu ne’ebé previstu iha artigu 267.
Nune’e iha alegasaun husu ba Tribunál atu aplika prizaun preventiva ba arguida ho insiál FJF tanba iha duni indísiu katak arguida envolve direta ba iha krime ne’ebé imputa ne’e.
Tanba arguida prátika hodi lohi vitima sira hodi hatama osan ba arguida, nune’e mós nia mak atende vítima sira nia dokumentu hodi servisu iha Austrália no arguidu mós mak hateten ba vítima sira nia servisu iha SEFOPE ne’ebé rekruta traballadór timoroan ba servisu iha Austrália.
Ho hahalok ne’e, Ministériu Públiku laiha duvida atu husu ba Tribunál hodi aplika medida koasaun Prizaun Preventiva ba arguida FJF.
Hataan ba alegasaun Ministériu Públiku Defeza arguida FJF, Defensór Públiku José da Silva, husu ba Tribunál atu tetu tuir Tribunál nia konviksaun.
Hafoin rona tiha parte hotu Juiz ne’ebé preside interrogatoriu dahuluk ba arguida FJF, Juiza Albertina Neves aplika medida koasaun Prizaun Preventiva ba arguida FJF tanba durante prosesu interrogatóriu dahuluk iha indisiu katak arguida envolve duni krime ne’ebé Ministériu Públiku imputa ba nia.
Notísia relevante:PNTL detein suspeitu na’in-rua bosok ema ba servisu
Jornalista: Natalino Costa
Editór: Florencio Miranda Ximenes
