DILI, 03 juñu 2024 (TATOLI)—Sekretaria Estadu Dezenvolvimentu Lokál (SEDL), segunda ne’e, halo abertura formasaun téknika ba líder komunitáriu eleitu hamutuk 31 husi munisípiu Dili.
“Abertura formasaun téknika lideransa ba líder komunitáriu eleitu sira ne’e oinsá kapasita sira liuhusi matéria hitu hanesan hakbiit komunidade, foti desizaun efetivu, jestaun planemaentu rurál, jestaun konflitu, ekipa serbisu, étika komunikasaun no jestaun projetu,” Sekretáriu Estadu Dezenvolvimentu Lokál, Mateus dos Santos Tallo, informa, iha salaun Institutu Nasionál Administrasaun Públika (INAP), Colmera.
Formasaun ne’e importante tebes ba líder komunitáriu sira atubele intende didi’ak sira-nia serbisu tuir lejizlasaun.
“Ha’u husu ba líder komunitáriu sira tenke aproveita didi’ak ho formasaun ne’e tanba ita-boot sira mak hakbesik liu ba povu no ita hotu hatene polítika IX Governu nian ne’e sei halo desentralizasaun, Governu hahú husi munisípiu ida-ne’e, tanba ne’e presiza tebes ita-boot sira-nia apoiu iha terrenu,” nia akresenta.
Notísia relevante : INAP kapasita funsionáriu na’in-25 kona-ba jestaun eskritóriu iha Baucau
Iha fatin hanesan, Diretór Jerál INAP, Policarpo Amilcar Boavida, informa, atividade ne’e ba líder komunitáriu eleitu ba períodu 2024-2030, ne’ebé ohin realiza bazeia ba dekretu-lei númeru 38/2012, ne’ebé fó kompeténsia ba INAP hodi fó formasaun ba líder komunitáriu iha Timor-Leste.
“Ohin ne’e ita halo uluk abertura ba líder komunitáriu 31 iha kapitál Dili, durante loron-lima, hotu mak kontinua ba munisípiu sira,” nia dehan.
Biban ne’e, nia husu ba formandu sira atu aproveita didi’ak formasaun tanba líder komunitáriu mak sai liman ain Governu nian ba povu.
“Ha’u husu líder komunitáriu sira tenke aproveita didi’ak formasaun ida-ne’e atu imi hatene imi-nia dever nu’udar líder komunitáriu iha baze, tanba sai líder ne’e responsabilidade boot no ita tenke hanoin saida mak ita atu halo hodi dezenvolve suku ne’ebé ita ukun,” nia fó hanoin.
Iha fatin hanesan, Xefe suku Manleuana, Jacob Tilman Soares, hateten, nu’udar líder komunitáriu, nia agradese ba INAP tanba bele realiza formasaun, ne’ebé fasilita tebes formandu sira sai líder komunitáriu ne’ebé di’ak bainhira atende povu iha terrenu.
Jornalista : Arminda Fonseca
Editora : Julia Chatarina
