Oknum PCIC hetan julgamentu tanba husu osan ba Fuzitivu Arnolfo nia-oan
DILI, 06 juñu 2024 (TATOLI) – Tribunál Primeiru Instánsia Dili, kinta ne’e (06/06), ne’e halo julgamentu ba kazu membru PCIC ne’ebé husu osan ba Fuzitivu Arnolfo Teves Jr nia-oan iha fulan hirak liu ba.
Iha prosesu julgamentu dahuluk ba kazu ne’e ho ajenda, rona uluk deklarasaun hosi Arnolfo Teves Jr nudar sasin ba kazu ne’e.
Defeza hosi arguidu fuzitivu, Advogadu Privadu, José Ximenes, hateten kliente Arnolfo Teves Jr nia prezensa iha Tribunál tanba atu rona nia depoimentu hanesan sasin.
“Hanesan ita bo’ot sira hatene bainhira nia (Arnolfo) iha hela sala detensaun no nia kontinua ba Becora, iha prosesu ida ke relativamente membru balun ke husu osan señor Teves nia-oan tanba ida-ne’e mak ohin Tribunál rona nia hanesan testemuña ba kazu ida-ne’e”, José Ximenes, dehan ba jornalista sira iha TJPID, Colmera, kinta ne’e.
Nia dehan, Ministériu Públiku liuhusi Gabinete Sentrál Kombate Korrupasaun no Kriminalidade Organizada haruka ona kazu ne’e.
“Ami nia kliente mai iha ne’e tanba antes ne’e Tribunál notifika señor Teves hanesan testemuña ba kazu ne’e, atu nia bele fó nia depoimentu ba kazu ne’e”, nia salienta.
Rekorda fali katak kazu membru PCIC husu osan ba Arnolfo Teves Jr ne’e akontese iha 8 fulan-Maiu 2024 iha ne’ebé membru PCIC ho inisiál OA husu osan ho montante $2.000 ba Fuzitivu Arnolfo Teves Jr nia-oan ne’ebé momentu ne’e hein nia aman iha prizaun Becora.
Iha asaun ne’e, membru PCIC ho inisiál OA husu osan ho montante $2.000 ba Fuzitivu nia oan mane, atu PCIC husu ba Guarda Prizioneiru Becora atu garante seguransa ne’ebé di’ak ba nia aman durante iha prizaun Becora.
Notísia relevante : Fuzitivu Arnolfo hakerek misiva nakloke ba Amu Papa no ONU
Jornalista: Natalino Costa
Editór : Zezito Silva
