Sasin iha Tribunál dehan Longuinhos la rai ‘’arma de fogo’’
DILI, 06 juñu 2024 (TATOLI) – Antigu Komandante Jerál Polísia Nasionál Timor-Leste, Longuinhos Monteiro la rai arma proibidu iha nia rezidénsia.
Miguel de Deus hanesan sasin haktuir katak arma ho tipu 24 iha Ministériu Públiku nia akuzasaun konsidera katak arma ne’ebé identifikadu hanesan ‘’arma de fogo’’, maibé nia diskorda tanba iha altura ne’ebá nia mak xefe armoria no kilat hirak ne’e laos kategoria ‘’fogo’’.
Sasin dehan, arguidu nia rezidénsia iha mós munisaun real no iha mós simuladas, ida-ne’e bele uza hodi hakanek ema maibé munisaun simuladas ne’e bele tiru só tarutu de’it maibé la hakanek ema.
“Tuir ha’u nia hatene ne’e katak tipu arma sira ne’ebé deskreve iha akuzasaun laran ne’e, hothotu laos ‘’arma de fogo”, sasin hateten iha sala julgamentu Tribunál Primeira Instánsia Dili, kuarta (06/06), ohin,
Nia deklara katak nia koñese di’ak arguidu Longuinhos tanba tempu barak servisu hamutuk bainhira arguidu sei hanesan Komandante Jerál. Nia ema ne’ebé brani iha desizaun, liuliu kazu konfrontu bo’ot no operasaun sira Longuinhos iha kapasidade atu rezolve.
“Nia ema ne’ebé di’ak no iha kapasidade atu rezolve sira”, nia afirma.
Iha sala julgamentu, sasin hateten ba Tribunál katak iha 2009 arguidu Longuinhos Monteiro mak sai Komandante Jerál PNTL no sasin hetan fiar hosi arguidu sai hanesan Xefe ba armoria PNTL nian hodi tau matan ba arma no munisaun PNTL nia to’o 2015.
Notísia relevante : Tribunál halo julgamentu ba arguidu Longuinhos Monteiro ba kazu rai kilat
Jornalista: Natalino Costa
Editór : Zezito Silva
