iklan

JUSTISA, HEADLINE

Ministru Justisa estabelese akordu konsensaun atribuisaun rai ba Governu Portugal

Ministru Justisa estabelese akordu konsensaun atribuisaun rai ba Governu Portugal

Ministra Justisa Portugal, Rita Alarcão Júdice bainhira simu husi nia omologu Ministru Justisa, Segio Hornai hodi partisipa enkontru ho xefe governu iha Palásiu Governu, Dili, sesta (07 juñu 2024). Imajen Tatoli/Antonio Daciparu

DILI, 08 juñu 2024 (TATOLI) – Ministru Justisa Sergio Hornai hamutuk ho nia omólogu Ministra Justisa Portugal, Rita Alarcão, asina akordu konsensaun atribuisaun rai ba Governu Portugal atu bele alastra konstrusaun ba Escola Portugues de Dili (EPD).

Governu Timor-Leste atribui rai 14.852 metru kuadradu ba Governu Portugés atu bele alastra konstrusaun ba Escola Portugues de Dili.

“Ohin primeira vez ita halo asinatura akordu adisionál ida ne’ebé diresiona ho ita-nia hanoin ba eskola EPD, Ministériu Justisa hanesan ministériu ida ne’ebé responsavél ba administrasaun no regulariza kona-ba terras no propriadade, ohin konstitui ka halo akordu konsesaun terenu ne’ebé mak ohin ha’u temi porvolta de 14.852 metru kuadradu ba ita-nia eskola EPD atu bele komesa halo projetu”, Sergio Hornai hateten ba jornalista sira hafoin simu vizita hosi Ministra Justisa Portugal Rita Alarcão iha nia servisu fatin Colmera, sábadu ne’e.

Ministru haktuir, Governu Portugal mantein apoia Timor-Leste partikularmente iha setór justisa. Kooperasaun bilateral ida-ne’e dezde 2002 hanaran SAPEO, mak oinsa bele reforsa polítika formasaun nian.

“Ita bo’ot sira hatene muito bem katak durante ita-nia perkursu lingua portuguesa sai hanesan problema tanba ne’e ita hakarak iha rekursu umanu ida ho kualifikasaun aas, iha koñesimentu ida ne’ebé adekuadu atu ita bele kontribui ba setór justisa, iha vertente oioin liuliu hanesan asesoria ne’ebé fó asisténsia ba servisu sira, ba interese lejislasaun nian karik lei sira ne’ebé tuan, ita presiza sira, atu bele tulun ita hodi hadia ita-nia lei sira ne’e”, nia afirma.

Sergio Hornai hateten, husu ba Ministra Justisa Portugal hodi mantein kooperasaun iha área formasaun Juiz, Prokuradór, Defensór Públiku, Advogadu, Ofisiál Justisa no mós orgaun polísia kriminál.

“Ita hatene muito bem, problema terras no problema notariadu ida ne’ebé lori mobilidade ba ita hosi fatin ida fatin seluk, ita sei iha difikuldade atu sira bele apoia ita atu trata dokumentu sira iha verasidade no iha ninia lejitimidade atu bele atribui ba personalidade idaidak”, nia informa.

Governante ne’e mós husu ba Governu Portugal atu apoia Timor-Leste ba direitu propriadade tanba direitu propriadade ne’e nudar fundamentál no abranjidu ba interese privadu no mós interese komum”, nia dehan.

Ministra Justisa Portugal, Rita Alarcão, sente onradu no kontente bele vizita Timor-Leste.

“Ha’u sente onradu no kontente bele vizita Timor-Leste. Ha’u mós kontente ohin mai vizita Ministru Justisa Timor-Leste, iha vizita ne’e hanesan afirmasaun ida hodi kontinua ita-nia kooperasaun sira ne’ebé ita iha ona durante ne’e”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!