DILI, 09 juñu 2024 (TATOLI) – Ekipa Zhavia Kuda Ulun FC susesu iha nia jornada hodi halo terus nia adversariu Iraler FC ho golu 3-0, iha jogu kontinuasaun faze grupu kopa Federasaun Futeból Timor-Leste (FFTL), ne’ebé realiza iha Estádiu Munisipál Dili, domingu loraik ne’e.
Jogu ba ekipa rua hala’o iha tuku 16:00 ne’ebé lidera husi árbitru prinsipál Francisco Pereira, juiz liña Henrique Pereira, Silviano Vieira no árbitru rezerva Bernardinho Mascarinhas. Bainhira árbitru fó ona orden ba ekipa rua atu hala’o jogu, jogadór sira lansa kedan kontra no atake ba malu tuir tékniku no abilidade ne’ebé mak treinadór sira haraik ona ba jogadór sira tuir idaidak nia funsaun.
Husi jogu ne’e Zhavia halo kedan atake ne’ebé maka’as halo Iraler book-aan la di’ak, maibé Iraler mós lakoi atu hatudu nia frakeza, nune’e jogu sai rame liutan.
Adeptus atus ba atus tuur nakonu iha tribun leten Estádiu nian. Adeptus sira hakilar ho lian ida-iadk nian feto mane no labarik hodi fó suporta ba sira nia ekipa favóritu, hodi halo kontente jogadór sira nune’e jogu bele rame liutan.
Jogu la’o ho barullu, minutu la’o ho kalma maibé kontinua haka’at ba oin, ekipa rua nafatin hatudu jogu ho bonitu ba malu. Jogu ne’ebé ho intensidade maka’as halo jogadór Zhavia ladun kontrola no ikus Kornelis Portela halo erru hasoru jogadór Iraler árbitru foti kedan desizaun hodi fó kartaun kinur ba jogadór ne’e hanesan samada atensaun bainhira komete tan mak dsei simu kartaun mean hodi sai ba liur labele hala’o tan jogu. Karatun ne’e jogadór Zhavia ne’e hetan iha minutu lima nia laran.
Jogadór Iraler nafatin joga ho kalma, nu’unka halo falta hasoru jogadór Zhavia nune’e árbitru nunka fó kartaun kinur no mean ba jogadór hirak ne’e. Zhavia ho ambisaun ne’ebé maka’as oinsa hatama golu, maibé defeza Iraler nian la fó fatin, ikus oportunidade di’ak ne’ebé Zhavia hetan seidauk bele ezekuta ho di’ak.
Jogu la’o to’o minutu 19 treinadór Iraler Mario Trindade haree nia defeza Virgilio Freitas (17) la hatudu jogu ne’ebé di’ak nia tenke dada sai no substitui kedan ho jogadór Norberto Ximenes (16).
Husi mudansa ne’e hametin liutan Iraler nia defeza, amibé jogu la’o to’o minutu 24 Iraler nia jogadór lina klaran halo falla jogadór Zhavia Kornelis Portela utiliza kedan oportunidade hodi lansa ona golu primeiru ba Iraler halo guarda rede Pedro Soares (20) labele antisipa ho di’ak bola tama liu rede laran no muda kedan rezultadu ba 1-0.
Golu ne’e halo Iraler tenke servisu maka’as, tenke halai duni bola ho velosidade ne’ebé maka’as maibé, servisu hotu ne’ebé Iraler halo hela de’it hanesan esforsu tanba nu’unka prodús golu ruma atu halo empata jogu ne’e.
Husi golu ne’e halo Iraler falta ona kontrolu di’ak iha kampo laran nune’e liu de’it minutu lima jogadór Zhavia utiliza oportunidade hodi marka tan golu segundu husi jogadór Santiago da Costa (26) muda kedan rezultadu ba 2-0.
Iraler dada iis naruk liutan, basa haree rezultadu ne’ebé komesa dook ona husi sira. Nu’udar jogadór profesionál Iraler nafatin hatudu jogu ne’ebé brillante ho fiar aan katak minutu sei naruk no sei bele hatudu rezultadu ne’ebé di’ak.
Maibé la sente minutu jogu nian suli de’it hanesan bee, iha minutu 45 árbitru deside aumenta tan adisionál minutu rua, to’o minutu rua ne’e termina mós laiha tan golu ruamakontese no árbitru deside fó deskansa minutu 15 hafoin kontinua fali no próvijoriu Zhavia lidera jogu ho eskore 2-0.
Bainhira tempu deskansa nian termina ona, jogadór no árbitru sira lori hika’as bola kabuar kor matak ne’e tama fali ba kampo laran hodi halo kompleta tan minutu 45 ikus nian, treinadór Iraler deside dadasai tan nia jogadór na’in rua, Suprianto Pereira (14) troka ho jogadór Silvino Ribeiro (26) no Pedro da Silva (10) troka ho Demetrio Xavier (9).
Husi estratejia ne’ebé Iraler halo atu lansa jogu ne’ebé ofensivu nune’e bele prodús golu lais, maibé hetok aat liutan basa Zhavia iha minutu segunda parte ne’e hatudu jogu ne’ebé estraordinariu tebes no sutu barak mak avansadu Zhavia halo maibé senpre salva husi guarda rede no sutu barak mós la kona iha alvu.
Maibé Iraler nafatin aguenta hodi responde ho atake maibé la ho velosidade ne’ebé maka’as tanba Zhavia domina tebes bola, maibé jogu la’o to’o minutu 48 guarda rede Zhavia José Lopes (1) nia kondisaun la di’ak treinadór Gaspar Amaral deside hasai hodi hatama fali guarda rede segundu Fortunato Gomes (22).
Husi jogu ne’e Zhavia domina liu bola, maibé sempre falla iha lina klaran no finalidade ikus iha minutu 53 Gaspar deside dada sai nia jogadór prinsipál na’in rua Ronaldino Amaral hanesan mediu (77) troka ho jogadór Gumario Moreira (5) nu’udar defeza klaran oinsa bele halo mudansa jogu lina klaran ho defeza, Miguel Barreto (10) hanesan mediu tenke sai troka ho jogadór Zacarias Cabral (2) hanesan jogadór defeza.
Estratejia ne’ebé treinadór Zhavia halo oinsa atu halo jogu ofensivu maibé barak liu bele halo defensivu oinsa bele tahan de’it Iraler labele prodús golu no Zhavia bele manán ona jogu ne’e bainhira minutu termina.
Maibé jogu la’o to’o minutu 57 jogadór Zhavia Jobelquim da Costa (71) halo erru hasoru jogadór Iraler árbitru foti kedan desizaun hodi fó kartaun kinur ba jogadór ne’e hanesan samada atensaun nune’e labele tan viola regra jogu nian.
Maske halo ona mudansa jogadór Iraler halo ameasa ne’ebé maka’as, ikus iha minutu 62 Gaspar sente la seguru tenke dada sai tan nia jogadór na’in rua Francisco da Costa (4) hanesan defeza sai hodi substitui fali ho Gelvanio Alberto (30) hanesan jogadór medio no avansadu, Jobelquim da Costa (71) hanesan jogadór mediu tenke sai hodi hatama fali jogadór Jilson dos Reis hanesan defeza.
Ho velosidade jogu ne’ebé iha jogadór Zhavia lakon nafatin kontrolu nune’e iha minutu 64 jogadór Fortunato Gomes hanesan Guarda rede tenta halo erru árbitru fó tan kartaun kinur hanesan sama atensaun. Ho nune’e treinadór Zhavia la nonok nafatin fó hanoin ba jogadór sira labele kria tan falta hasoru jogadór Iraler tanba nia halo ona mudansa ba jogu.
Husi mudansa ne’ebé Gaspar halo ikus fó duni rezultadu di’ak ba Zhavia tanba iha minutu 76 jogadór suplente Zacarias Cabral konsege lees rede Iraler muda kedan rezultadu tur metin ba 3-0. Iraler sente todan liutan tanba rezultadu semo dook ona husi realidade ne’ebé sira esforsu halo golu no empata jogu ne’e maibé mehi hirak ne’e hela de’it hanesan mehi.
Tanba sofre ona golu tolu treinadór Iraler deside dada sai nia jogadór na’in rua iha minutu 79, Carlos Belo (21) hanesan jogadór mediu tenke sai tanba halo fallansu barak iha lina klaran troka fali ho jogadór Camilio Soares (22) hanesan mós jogadór mediu, Frederico Soares (15) hanesan jogad’or defeza tenke sai tanba ladun antisipa bola ho di’ak hodi troka fali ho jogadór defeza Agustinho Soares (12).
Maske Iraler halo ona mudansa ba nia jogu maibé nafatin falla atu responde golu to’o minutu jogu nian termina nafatin hela ho zero no Zhavia hela ho vitoria hodi rekolla pontu tolu.
Husi vitoria ne’ebé Zhavia hetan lori ekipa ne’e rekolla pontu hamutuk haat no lidera provijoriu tabela klasifikasaun grupu C ho pontu haat, pozisaun segundu Iraler ho pontu tolu, pozisaun terseiru FIEL FC ho pontu rua no ikus liu Maubale FC ho pontu ida.
Treinadór apresia Jogadór
“Rezultadu ne’ebé mak ohin ami rekolla ne’e importante tebes ba ha’u no ha’u nia ekipa. Iha jogu ne’e ha’u orienta ona ba jogadór sira katak ita tenke joga ho másimu tan iha jogu primeiru ita empata ona, entaun ida ne’e jogadór sira kumpri ohin ami rekolla duni pontu tolu,” treinadór Zhavia Gaspar hatete ba jornalista sira hafoin jogu termina.
Nia dehan, ba jogu tuir mai tenke haka’as aan nafatin hodi hatudu jogu ne’ebé brillante nune’e bele rekolla tan pontu tolu hodi haka’at ba jogu oitavu finál.
“Jogu ba oin ami nafatin haka’as aan maka’as nune’e ami bele haka’at ba oin, nune’e bele fó kontente ba ha’u nia adeptus sira hotu,” treinadór ne’e tenik.
Iha fatin hanesan treinadór Iraler Mario Trindade hatete, rezultadu ne’ebé nia ekipa hetan hanesan kbi’it hotu jogadór nian mak to’o hanesan ne’e no sei hadi’a di’ak liutan iha jogu tuir mai.
“Ami nia kbi’it mak to’o hanesan ne’e, ba jogu tuir mai ami sei hadia atu bele rekolla pontu tolu ami haka’at ona ba oitavu finál. Ohin ne’e ami lakon iha jogada maibé ida ne’e la’os ikus ba ami, ami sei hadi’a,” treinadór Iraler hateten.
Tiuir nia, durante ne’e ladun halo treinamentu ho di’ak tanba susar atu hetan kampo ne’ebé bele fasilita treinamentu ho nune’e dalabarak liu tenke treinu fíziku no buka iis mak barak iha tasi ibun.
Notísia relevante:Empata 0-0, Maubale FC fahe pontu ho FIEL FC iha kopa FFTL
Jornalista: Hortencio Sanchez
Editór: Florencio Miranda Ximenes
