Top

Sasin deklara ba Supremu Tribunál katak Fuzitivu Arnolfo la envolve iha krime asasinatu

Defeza Fujitivu Arnolfo Teves Jr, Advogadu Privadu José Ximenes ko'alia ho mídia. Imajen TATOLI/Natalino Costa

DILI, 11 juñu 2024 (TATOLI) –  Prosesu audisaun ba Fuzitivu Arnolfo Teves Jr, sasin na’in-rua deklara iha Sepremu Tribunál Justisa katak fuzitivu la envolve krime asasinatu iha Filipina maibé hanesan persegisaun polítika.

“Ohin hanesan ita bo’ot sira hatene katak data de audisaun ba ami nia kliente mak rona testemoñia sira ne’ebé ami aprezenta. Ita bo’ot sira hatene ami iha testemuña pelumenus iha na’in-hitu, ohin, Tribunál rona uluk testemuña na’in-rua, ida mak señor Teves, nia hanesan Sekretaris no testemuña ida seluk mak Ferndinan Topacio, nia hanesan Advogadu koñesidu iha Filipina. Iha testemuña sira-nia deklarasaun katak akuzasaun hosi autoridade polísia akuza ba señor Teves iha Filipina ne’ebé hateten ami nia kliente envolve kazu asasinatu iha Filipina ne’e lalos, laos krime ne’ebé sira akuza ba ami-nia kliente, ne’e la murni. Maibé lolos ne’e mak ami nia kleinte ne’e hetan presegisaun polítika, ida-ne’e mak ami-nia konkluzaun, depois ami sei fó informasaun tuir mai tán”, Defeza José Ximenes haktuir hafoin akompaña Arnolfo iha prosesu audisaun, Caicoli, tersa, ohin.

José konta, tuir testemuña sira-nia deklarasaun ba Tribunál hateten katak sira hela iha Filipina ne’e ladún seguru tanba kazu Governadór Royal da Gama nia mate, autoridade seguransa obriga sira tenke hateten katak kazu Royal da Gama ne’e nia autór mak Arnofo Teves Jr.

“Hanesan señor Teves nia Sekretaris ohin fó nia depoimentu katak durante investigasaun ne’ebé polísia Filipina halo iha ne’ebá, sira hakarak ne’e husu ba sasin sira ne’e tenke kondena Teves.  Sasin mós durante ne’e hetan presegisaun oioin to’o nia halai mai hela tiha iha Timor”, nia adianta.

José Ximenes triste Supremu Tribunál Justisa halimar ema nia liberdade   

Iha bibin ne’e, Advogadu Privadu José Ximenes lamenta ho desizaun Supremu Tribunál Justisa ne’ebé liberta tiha klienta Fuzitivu Arnolfo Teves Jr iha oras balun nia-laran depois hasai mandadu hodi husu autoridade polísia detein hikas fali Arnolfo ba sela detensaun.

“Ha’u triste porke Filipina nian Governu la sériu, nia hakarak estradita ami-nia klienta ba, maibé ninian pedidu ida-ne’e lalao tuir ita-nia regra”, nia informa.

Antigu PGR ne’e hateten, razaun iha segunda (10/6) horseik  Supremu Tribunál Justisa hasai mandadu hodi liberta nia kliente Fuzitivu Arnolfo Teves Jr tanba bazea ba iha lei númeru 15/2011 kona-ba kooperasaun internasionál no materia penál artigu 61.

Prosesu audisaun ne’e prezide hosi Juiz Titulár, Juiza Jacinta Correia. Ministériu Públiku reprezenta hosi Prokuradór Jacinto Babo no Fuzitivu Arnolfo Teves Jr hetan asisténsia hosi Advogadu Privadu José Ximenes inklui Advogadu privadu rua tán.

Notísia relevante : Autoridade polisiál asegura Fuzitivu Arnolfo hafoin liberta hosi Tribunál

Jornalista : Natalino Costa

Editór : Zezito Silva

Publisidade

Leave a Reply

Latest Post

error: Content is protected !!