NASIONÁL, DESPORTU, DILI, HEADLINE

Tebe sai Bita-Ba, Zhavia FC hein Kampung Alór no Buradu iha oitavu finál

Tebe sai Bita-Ba, Zhavia FC hein Kampung Alór no Buradu iha oitavu finál

Jogu Futebol Kopa Maun Boot Kayrala Xanana Gusmão 2024, Zhavia F.C kontra Bita-Ba FC, iha estadiun Munisípal Dili, tersa (11/06). Imajen Tatoli/Francisco Sony

DILI, 11 juñu 2024 (TATOLI) – Ekipa istimadu husi Munisípiu Bobonaro Zhavia FC susesu iha nia jornada 16 finál kopa Maun Boot Kay Rala Xanana Gusmão hodi tebe sai Bita-Ba FC ho rezultadu 2-0, nune’e ultrapasa kedan ba oitavu finál hodi hein Kampung Alor FC no Buradu FC ne’ebé sei hala’o jogu iha aban. Iha ne’ebé sé mak manán tenke hasoru Zhavia.

Jogu ba ekipa rua hala’o iha Estádiu Munisipál Dili tersa loraik ne’e no dirije husi árbitru prinsipál Pedro Braga, juiz liña Antonio Carvalho, Henrique Pereira no árbitru rezerva Fernando da Costa.

Bainhira oras to’o árbitru fó orden ekipa rua lansa kedan kontra no atake ba malu tuir tékniku no abilidade jogadór idaidak nian tuir saida mak treinadór haraik ona durante treinamentu.

Jogu Futebol Kopa Maun Boot Kayrala Xanana Gusmão 2024, Zhavia F.C kontra Bita-Ba FC, iha estadiun Munisípal Dili, tersa (11/06). Imajen Tatoli/Francisco Sony

Zhavia ho ambisaun boot hakarak manán jogu ne’e, nune’e jogadór sira lansa atake ne’ebé adekuadu kontra Bita-Ba. Bita-Ba mós ekipa ida ne’ebé hakarak manán iha jogu ne’e la nonok responde atake hirak ne’ebé Zhavia halo ho seriu.

Jogu ne’e la’o rame liu bainhira adeptus klube rua okupa metin tribun Estádiu nian hakilar ho lian maka’as hodi fó kontente ba sira nia ekipa favoritu.

Bita-Ba hetan oportunidade barak maibé lakon iha lina klaran ikus oportunidade hirak ne’e hela de’it hanesan oportunidade tanba la prodús golu.

Zhavia mós lansa atake ne’ebé ho ambisaun, nune’e iha minutu 26 hatudu duni rezultadu ne’ebé di’ak tanba jogadór Domingos Americo (9) lansa ona golu primeiru dudu rezultadu ba 1-0.

Golu ne’e halo intensidade jogu aumenta maka’as liutan, liuliu armada Bita-Ba ne’ebé sofre ona golu, meiu hotu Bita-Ba halo maibé la aguenta ho atake ne’ebé mak Zhavia halo ho tékniku ne’ebé brillante.

Avansadu Bita-Ba la nonok esforsu aan maka’as maibé labele halo buat ida tanba defeza Zhavia nian metin hanesan moru. La fó fatin Bita-Ba atu prodús golu tuir nia hakarak.

Minutu haka’at ho nonok ba oin, jogu la’o ho barullu. Minutu priemeira parte besik ona nia rohan, maibé árbitru deside aumenta tan adisionál minutu tolu. Husi minutu ne’ebé aumenta Zhavia utiliza ho di’ak nune’e iha minutu 43 jogadór Jobelquim da Costa lansa tan golu ida muda rezultadu metin ba 2-0, ho golu ne’e mak termina jogu primeira parte nian.

Dolar ba segunda parte ekipa rua nafatin lansa kontra no atake ne’ebé maka’as. Bita-Ba lakoi atu lakon iha jogu ne’e, halo atake ne’ebé maka’as maibé la konsege ezekuta ho di’ak iha nia finalidade.

Treinadór Bita-Ba utiliza meiu hotu, orienta jogadór sira husi lina ba lina, maibé nafatin falla. Zhavia mós lansa atake atu aumenta golu maibé laiha ona oportunidade tanba Bita-Ba nia defeza taka metin.

Ho jogu ne’ebé laiha forsa diferente to’o minutu normál termina laiha tan ekipa ida mak prodús tan golu nune’e, vitoria hela permanente ba Zhavia hodi haksoit ona ba oitavu finál. Enkuantu Bita-Ba obrigadu tenke hela ho derota no hanesan mós ekipa ida ne’ebé katik sai uluk iha jogu 16 finál.

Notísia relevante:Klube futeból 16 mak kontinua kompete iha Kopa Xanana

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!