Horta kestiona kapasidade membru Governu hodi ezekuta OJE 2024
DILI, 20 juñu 2024 (TATOLI)- Prezidente Repúblika, José Ramos Horta, kestiona kapasidade no dezempeñu membru Governu sira hodi ezekuta Orsamentu Jerál Estadu (OJE) 2024 tanba foin atinje 28.1%.
“Ida ne’e tanba falta kapasidade membru Governu sira nian, tanba la konsege ezekuta orsamentu ho di’ak, maske orsamentu 2024 ne’e hatun ona, Maun Xanana hatete hatun orsamentu ne’e atu Ministru sira implementa ho di’ak. Maibé Ministru sira kontinua la hatene ezekuta nia orsamentu, nune’e tenke haree didi’ak produtividade kada ministru sira,” Xefe Estadu afirma asuntu ne’e iha Palasiu Presidensiál, Bairru Pité, Dili, kuarta ne’e.
Notísia relevante:Governu haree atu aumenta dezempeñu ezekusaun OJE 2024 iha trimestre daruak
Maske ne’e, Xefe Estadu mós rekoñese atu avalia dezempeñu no produtivdade membru Governu la’ós nia nia kompetensia. Tanba Primeiru-Ministru nia kompeténsia atu tau atensaun ba membru Governu ida-idak dezempeñu ezekusaun nian.
Tuir Portál Transparánsia ne’ebé Ajénsia TATOLI asesu iha tersa (18 juñu 2024) ne’e, haktuir katak ezekusaun OJE 2024 ho nia orijen $2,237,618,655.00, kompromisu sira $208,254,913.56, obrigasaun sira $83,545,551.73, atuál $545,951,200.42, saldo $1,399,866,989.29 ho ninia ezekusaun 28.1%.
Ho ezekusaun ne’ebé minimu tebes ne’e, Governu konstituisionál da-sia (IX), liuhusi Primeiru-Ministru alerta ba membru Governu hotu haree atu aumenta dezempeñu ezekusaun OJE 2024 iha trismestre daruak.
Tanba husi relatóriu ne’e prelimináriu nota katak to’o finál trismestre dahuluk Governu foin ezekuta OJE 2024 ne’e atinje 11% maioria iha saláriu vensimentu no mós bens serbisu ne’ebé ho montante kiik-oan liu.
Entretantu, Parlamentu Nasionál (PN) aprova proposta-lei númeru 4/VI(1a) Orsamentu Jerál Estadu (OJE) 2024 ho montante biliaun $1,95.
OJE 2024 ne’ebé Governu aprezenta ho montante konsolidadu biliaun $1,95 ba Administrasaun Sentrál, Rejiaun Administrativa Espesiál Oé-cusse Ambeno (RAEOA) no Seguransa Sosiál sein Fundu Rezerva Seguransa Sosiál.
Montante ne’e fahe ba kategoria saláriu no vensimentu saláriu no vensimentu, bens no servisu millaun $386,3, transferénsia públika millaun $589,7, kapitál menór millaun $34,2 no kapitál dezenvolvimentu millaun $411.
Orsamentu Seguransa Sosiál inklui Fundu Rezerva Seguransa Sosiál hetan alokasaun millaun $347,6.
Prevee mós ba asuntu ekonómiku millaun $788,2, protesaun sosiál millaun $467,1, edukasaun millaun $140,9, saúde millaun $66,2 no abitasaun no infraestrutura koletiva millaun $45,2.
Notísia relevante:PN simu ona relatóriu ezekusaun OJE 2024 trimestre dahuluk husi Governu
Jornalista: Hortencio Sanchez
Editór: Florencio Miranda Ximenes
