iklan

NASIONÁL, DILI, HEADLINE

Padre Graciano: Husu Maromak haraik matenek ba PM Xanana lori povu ba moris di’ak

Padre Graciano: Husu Maromak haraik matenek ba PM Xanana lori povu ba moris di’ak

Imajen/Media GPM

DILI, 20 Juñu 2024 (TATOLI)—Primeiru-Ministru (PM), Kay Rala Xanana Gusmão, kinta (20 juñu2024) ne’e, selebra loron moris nian ba da-78 (20 Juñu 1946-20 Juñu 2024), liuhusi misa agradesimentu ne’ebé hala’o iha Parókia Nossa Senhora Imaculada da Conceição, Balide, Dili.
Padre selebrante Vigáriu Jerál Arkedioseze Metropolitana Díli, Pe. Graciano Santos Barros, hateten liuhusi orasaun hasa’e agradesimentu ba Maromak hodi husu grasa saúde, moris naruk, matenek no sabedoria ba Primeiru-Ministru, Kay Rala Xanana Gusmão, atubele kontinua lori nasaun Timor-Leste no povu ida-ne’e ba moris di’ak no prósperu.

Imajen/Media GPM

Nai Lulik ne’e hateten, bainhira reza ne’e keta ko’alia barak tanba mensajen Evanjélika ohin nian fó hanoin atu bainhira halo orasaun, tenke mai ho sentidu gratidaun, mai husi laran, mai ho fiar hanesan orasaun ne’ebé Jesus rasik hanorin “Ami Aman iha Lalehan”.

“Orasaun ‘Ami Aman’ mak sai referénsia ba ema fiar-na’in sira. Nune’e, ohin, iha misa ida-ne’e hasa’e orasaun ho sentidu gratidaun hamutuk ho Primeiru-Ministru, Kay Rala Xanana Gusmão, ba matenek, saúde, moris naruk atu bele hamutuk lori rai no povu ne’e ba oin nafatin,” refere nota ne’ebé Agência Tatoli asesu, kinta ne’e.

Iha misa nia rohan, Padre Lúcio de Deus hato’o agradesimentu no parabeniza Primeiru-Ministru, Kay Rala Xanana Gusmão, ne’ebé loron ida ohin selebra ninia aniversáriu ba da-78 no deseja saúde di’ak nafatin atubele kontinua lori povu no rai ne’e ba moris di’ak tuir Maromak nia hakarak.

“Ha’u lori amu bispu sira-nia fatin, nai-lulik sira-nia fatin hato’o parabens ba Primeiru-Ministru Kay Rala Xanana Gusmão ne’ebé maks elebra tinan moris nian. Ita espera ho tinan aumenta ne’e, bele hasantu liután, forte liután no iha liután sabedoria,” Pe. Lucio hateten.

Iha biban ne’e, Primeiru-Ministru, Kay Rala Xanana Gusmão, hato’o agradesimentu ba ema hotu-hotu ne’ebé mak reza ba nia iha loron espesiál ida-ne’e.

“Haú hakarak agardese de’it ba Amu selebrante no koselbrante sira. Agradese mós ba maluk sira hotu ne’ebé mak marka prezensa hodi hamutuk ho ha’u iha misa agradesimentu ida-ne’e,” Xanana Gusmão hateten.

Partisipa iha misa agradesimentu ne’e, membru IX Governu Konstitusionál, membru Parlamentu Nasionál (PN), Autoridade Polísia Nasionál Timor-Leste (PNTL) no sarani sira.

PR Horta parabeniza Xanana Gusmão

Entretantu, Prezidente Repúblika José Ramos Horta hato’o votus parabéns ba aniversariu Primeiru-Ministru Kay Rala Xanana Gusmão ne’ebé kompleta ona 78.

Prezidente Repúblika, Jose Ramos-Horta selebra aniversariu ba Primeiru-Ministru, Kay Rala Xanana Gusmão.ha Palásiu Prezidensiál, Bairru-Pité, kinta (20/06). Imajen Tatoli/Egas Cristóvão

“Parabéns Maun Boot Xanana, nia tinan aumenta maibé saúde di’ak loos, nia biasa toba kalan boot, hader sedu fuma maka’as, maibé nia saúde di’ak loos, vida naruk nafatin ba nia,” Horta hatete iha Palásiu Prezidensiál, kinta ne’e.

Bainhira hato’o parabéns ba Kay Rala Xanana Gusmão, Prezidente Repúblika hamutuk ho labarik kiik besik 50 iha kantina matak Palásiu Prezidensiál halo supreza ba lider istoriku ne’e ho dosi bolu kiikoan ho lilin.

“Parabéns abo Nana, parabéns abo Nana, vida naruk saúde di’ak nafatin, labarik sira kanta no ka’er ho dosi se ba lider karismatiku ne’e”, katak PR.

Bainhira hú tiha lilin Xanana Gusmão fera dosi ne’e ho domin fahe ba labarik sira no ko’a fó  ba Prezidente Repúblika nu’udar simbolu domin husi PM ba PR.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!