DILI, 25 Juñu 2024 (TATOLI) – Diretór Nasionál Bombeiru, Paulo Maia, admite katak falta liña koordenasaun sai dezafiu ba Bombeiru hodi halo intervensaun rápida kombate ba inséndiu.
“Ami konsidera, durante ne’e, ami-nia intervensaun hodi kombate ba inséndiu iha komunidade ne’e maka tarde, tanba ami simu informasaun husi komunidade mós tarde”, Paulo Maia dehan iha Caicoli, ohin.
Diretór ne’e esplika, tuir regra, bainhira mosu sinál ruma kona-ba ahi han uma tenke buka lalais kontaktu ho Bombeiru, nune’e bele halo lalais intervensaun hodi salva komunidade nia uma no sasán sira.
“Kuandu liu ona minutu ualu ba leten maka foin halo kontaktu, automatikamente sei labele salva komunidade ninia sasán ne’ebé iha uma laran. Maibé, ida ne’e maka realidade ne’ebé akontese iha baze. Dezafiu seluk maka komunidade sira nunka hakarak rai númeru kontaktu Bombeiru nian, bainhira mosu ona inséndiu maka foin halai bá-mai buka Bombeiru nia númeru kontaktu”, dirijente ne’e lamenta.
Tanba ne’e, nia husu ba populasaun sira atu buka liña kontaktu ho Bombeiru, nune’e kuandu akontese ahi han uma tenke halo esforsu hodi labele liu husi minutu ualu, tanba liu husi minutu sira ne’e maka uma sira sei mutuk hotu no sasán sira iha uma laran mós la salva.
Paulo Maia salienta katak iha mós dezafiu seluk ne’ebé Bombeiru enfrenta mak bainhira halo intervensaun, komunidade sempre interompe serbisu Bombeiru nian no dala barak sira hamriik nakonu tiha iha fatin akontesimentu no halo Bombeiru labele serbisu ho fleksivel.
Ho kauza sira hanesan ne’e, nia solisita ona ba komunidade atu iha futuru bainhira akontese inséndiu iha fatin ne’ebé de’it tenke husik estrada sira mamuk no fó espasu livre ba Bombeiru hodi hala’o nia serbisu ho lalais.
Bombeiru iha karreta ne’ebé sempre prontu durante oras 24 nia laran atu responde ba kauza husi inséndiu sira, hanesan tanke karreta bee nian sempre enxe nakonu, bainhira simu kontaktu ruma ekipa sira lori sai kedan bá fatin akontesimentu no iha Dili iha karreta haat mak prontu atu responde ba inséndiu.
Notísia relevante: Bombeiru prevee rihun $480 ba akizisaun karreta hitu kombate ba inséndiu
Jornalista: Tomé Amado
Editora: Maria Auxiliadora
