DILI, 26 juñu 2024 (TATOLI) – Ekipa istimadu husi Munisípiu Bobonaro Zhavia FC obrigadu tenke termina ona jornada jogu iha oitavu finál kopa Maun Boot Kay Rala Xanana Gusmão 2024 bainhira kontra adversáriu Coach Eleven ho rezultadu 5-2.
Jogu ba ekipa rua realiza iha Estádiu Munisipál Dili, kuarta loraik ne’e. Ekipa rua hatudu jogu ne’ebé brillante ho forsa ne’ebé hanesan to’o minutu normál jogu nian termina tenke hela ho empata 1-1. Husi rezultadu ne’e árbitru foti kedan desizaun fó oportunidade ba jogadór sira tiru penaliade, nune’e buka se mak bele ezekuta ho di’ak nune’e ultrapasa ba semi-finál.
Iha ezekusaun penaliade ne’e, Zhavia nia jogadór na’in rua Yohanes Gusmão (25) no Samuel da Cruz (11) labele ezekuta ho di’ak ikus taka dalan ba Zhavia haka’at ba semi-finál basa Eleven nia jogadór na’in haat konsege ezekuta penaliade ho di’ak.
Bainhira jogu hahú iha minutu normál ekipa rua lansa kontra no atake ne’ebé maka’as ba malu tuir tékniku no abilidade ekipa idaidak nian oinsa bele prodús lalais golu.
Zhavia ho ambisaun ne’ebé maka’as hakarak manán jogu ne’e, maibé Eleven la fó fatin hodi halo atake ne’ebé maka’as hasoru Zhavia ikus ekipa rua seidauk bele halo golu ba malu.
Maske hetan presaun maka’as husi Eleven, la fó impaktu ba Zhavia hodi hatudi nia jogu ne’ebé bonitu. Ikus iha minutu 14 esforsu Zhavia nian la hela de’it hanesan esforsu tanba jogadór Domingos Americo (9) konsege lees ona rede Eleven hodi muda rezultadu ba 1-0.
Golu ne’e halo Eleven la hakmatek iha kampo laran, jogadór sira utiliza meiu hotu oinsa responde golu ne’ebé Zhavia fó ona ba sira, maibé esforsu hotu seidauk fó rezultadu di’ak tanba jogadór Zhavia la fó fatin.
Intensidade jogu komesa sa’e maka’as iha minutu 20 ba leten, adeptus sira okupa tribun Estádiu nian hakilar ho lian oioin, fó suporta ba sira nia ekipa favoritu, oinsa bele iha vontade ne’ebé di’ak hodi hatudu jogu bonitu.
Zhavia halo blokea maka’as ba avansadu Eleven nian, nune’e avansadu sira la hetan oportunidade halo golu to’o minutu primeira parte termina rezultadu hela provijoriu 1-0 ne’ebé lidera husi Zhavia.
Dolar ba segunda parte Zhavia mantein ho ritmu jogu ne’ebé iha la fó fatin ba Eleven atu hatudu jogu tuir sira nia hakarak. Maibé jogadór Eleven ne’ebé nakonu ho esperiensia hatudu jogu ne’ebé ho kalma maibé provoka defeza Zhavia nian, ikus iha minutu 44 defeza Zhavia halo erru hasoru avansadu Eleven iha kedan lina oin Zhavia nian árbitru deside fó kedan penalidade ba jogadór Eleven hodi sutu livre.
Penalidade ne’e ezekuta husi jogadór Rofino Gama (20). Sutu ne’ebé Rofino halo tama duni ba rede laran Zhavia nian tanba guarda rede la antisipa ho di’ak, muda kedan rezultadu ba 1-1.
Jogu sai manas liutan, jogadór ekipa rua defende maka’as sira nia ekipa, la fó ulun ba malu, nune’e to’o minutu normál jogu nian termina ekipa rua tenke hela ho empata 1-1, árbutru foti kedan desizaun fó ba ekipa rua sutu penalidade hodi buka sorte sé mak manán. Tuir regulamentu jogu iha ona faze oitavu finál ekipa ida tenke manán hodi avansa ba oin no ekipa ida tenke lakon.
Prosesu sutu penalidade ne’e, treinadór Zhavia fó konfiansa ba nia jogadór prinsipál hamutuk haat mak atu saia hanesan ezekutadór. Cornelio Soares (55) hanesan ezekutadór primeiru konsege tiru duni bola tama ba rede laran, maibé jogadór na’in rua segundu Yohanes no Samuel la konsege tiru bola tama ba rede laran fó kedan derrota ba Zhavia.
Enkuantu Eleven nian treinadór fó konfiansa ba jogadór na’in haat, Rofino Gama (20), Expedito Conseição (10), Marcos Morais (38) no Carlos Ximenes (18). Durante ezekuta penalidade laiha uda mak falla bola tama liu ba rede laran fó kedan vitoria ba Eleven hodi manán Zhavia ho rezultadu finál 5-2.
Husi rezultadu ne’e lori ona Eleven ba tur hakmatek iha semi-finál hodi hein jogu seluk tuir mai no Zhavia tenke para ona jogu hodi hein dali oportunudade seluk iha tinan oin.
Notísia relevante: Manán Relay 3-0, Zhavia provizóriu lidera grupu A iha kopa Xanana
Jornalista: Hortencio Sanchez
Editór: Florencio Miranda Ximenes
