DILI, 27 juñu 2024 (TATOLI) – Ekipa istimadu husi Munisipiu Lautem Buradu FC susesu iha nia jornada oitavu finál liu husi nia jogadór avansadu Leonito dos Santos (17) konsege fura kuak rede adversariu Jomar FC, nune’e lori kedan ekipa ne’e ultrapasa ba semi-finál kopa Maun Boot Kay Rala Xanana Gusmão ne’ebé realiza, kinta lokoraik ne’e, iha Estádiu Munisipál Dili.
Bainhira jogu la’o jogadór sira iha kampu laran lansa kedan kontra no atake ba malu tuir orientasaun treinadór idaidak nian ne’ebé haraik ona ba jogadór sira.
Buradu ne’ebé identiku husi Lospalos ne’e iha ambisaun ne’ebé maka’as hakarak halo moe ekipa kapitál Dili Jomar FC ne’ebé durante ne’e iha ambisaun boot atu tebesai Buradu.
Kontra atake ne’ebé Buradu halo, fó presaun maka’as ba Jomar oinsa hatudu nia jogu ne’ebé bonitu nune’e bele manán Buradu. Joga ba ekipa rua la’o iha ámbitu ne’ebé la hakmatek tanba adeptus husi klube rua nunka tur nonok de’it iha tribun leten, hakilar ho lian oioin fó suporta másimu ba sira nia ekipa favoritu.
Jomar lansa atake ne’ebé maka’as maibé atake hirak ne’e hela de’it hanesan atake tanba defeza Buradu nunka fó fatin, avansadu Jomar José Santos (7) lansa sutu barak maibé sutu hirak ne’e halai ses husi alvu.
Maske Jomar halo presaun la hamate Buradu nia esperansa, kontinua firme iha kampo laran hatudu jogu ne’ebé di’ak maske klube ne’e mai husi Munisipiu, jogadór barak nunka iha esperiensia joga iha liga kompara ho Jomar nia jogadór ne’ebé barak mak joga iha liga no balun eis selesaun nasionál.
Buradu hatudu duni nia komitmentu, ho forsa ne’ebé naton, iha minutu 21 jogadór Leonito dos Santos konsege fura duni rede Jomar hodi muda rezultadu ba 1-0.
Golu ne’e halo Jomar nia mentalidade monu no la konsege hatudu jogu ne’ebé di’ak iha kampo laran, falta ona kontrolu no la konsege ezekuta oportunidade sira ho di’ak, nune’e to’o minutu primeira parte termina rezultadu provijoriu hela ho 1-0.
Dolar ba segunda parte ekipa rua nafatin hamrik metin ho pozisaun idaidak hodi kontinua kadi sira nia luta iha kampo laran. Jomar utiliza meiu hotu oinsa halo empata jogu ne’e. Buradu mós la nonok esforsu atu aumenta golu, maibé laiha oportunidade ne’ebé mak serteza.
Jomar buka meiu oioin, maibé defeza Buradu sempre taka metin iha lina oin halo avansadu Jomar falla iha finalidade, nune’e to’o minutu jogu nian termina laiha tan golu ruma mak akontese nune’e vitoria hela metin kedan ba Buradu no Jomar hela ho derrota hodi hein fali oportuniade seluk iha tinan oin.
Vitoria husi Buradu lori semo kedan ekipa kina-moko ne’e avansa ona ba jogu semi-finál bainhira hetan oportunidade ultrapasa tan ba finál.
Notísia relevante: Buradu FC dudu sai Kampung Alor husi kopa Xanana
Jornalista: Hortencio Sanchez
Editór: Florencio Miranda Ximenes
