DILI, 01 jullu 2024 (TATOLI) – Organizasaun naun-govenamentál Rede Feto Timor-Leste (RFTL) kontinua halo sensibilizasaun ba informasaun kona-ba tipu violénsia bazeia ba jéneru iha suku sira iha territóriu.
“Ita ko’alia kona-ba kazu violénsia bazeia ba jéneru, iha munisípiu sira balun kontinua akontese. Ho ida ne’e, atu evita violénsia ne’e mak daudaun ami hamutuk ho rede membru feto sira iha munisípiu halo sosializasaun kona-ba tipu violénsia sira atu komunidade bele hatene hodi evita violénsia sira”, Prezidente Rede Feto, Zelia Fernandes, hateten iha nia knaar-fatin, Caicoli, Dili.
Nia dehan iha tipu violénsia ne’ebé sira-nia parte halo divulgasaun ba informasaun ne’e mak hanesan violénsia bazeia ba fízika, seksuál, doméstika no seluk tan.
“Sensibilizasaun importante tebes tanba dalaruma ita ko’alia kona-ba asédiu seksuál, maibé ita-nia joven barak mak la hatene asédiu seksuál, entaun ita halo sosializasaun atu sira bele hatene tipu violénsia seksuál nune’e bele halo prevensaun sedu”, nia dehan.
Kona-ba violénsia doméstika no seluk tan, Rede Feto halo esforsu atu vítima sira ne’e hato’o keixa diretamente ba RFTL no haruka liubá FOKUPERS hodi fó asisténsia ba sira.
Iha sorin seluk, Diretora-Ezekutiva Forum Komunikasaun Feto Timor Lorosa’e (FOKUPERS), Domingas Afonso Amaral, hateten husi Janeiru to’o Juñu sira rejista kazu violénsia bazeia ba jéneru hamutuk 138, husi númeru ne’e 131 mak violénsia doméstika.
Jornalista: Arminda Fonseca
Editora: Maria Auxiliadora
