DILI, 01 jullu 2024 (TATOLI)–Diretór Servisu Edukasaun Munisípiu Ainaro, Patrício da Costa, hateten Servisu Edukasaun Munisípiu Ainaro, iha fulan-maiu liubá destaka ona profesór foun hamutuk 44 bá iha eskola 14 hodi hanorin estudante ensiñu báziku.
“Profesór ne’ebé Ministériu Edukasaun (ME) koloka ba ami edukasaun Ainaro nian hamutuk 45, maibé ida rejigna-an tiha, entaun hela 44 kompostu husi mane 19 no feto 25, neʼebé ita koloka ona,”Patrício da Costa, informa ba TATOLI, iha Komisaun Funsaun Públika (KFP), Matadouro, Dili, segunda ne’e.
Tuir nia profesór hirak ne’e, destaka bá iha Ensinu Báziku Filiál (EBF) Sarlala Balibo, ema ida, Ensinu Báziku Sentrál Samoro, ema na’in ida, EBF Edy na’in ida, Eskola Realeso (1), EBC Rita (5), EBF Gauloro EBC Rimori (4), EBC Betulala (8), EBC Mausiga (3), EBC Manelobas (7), EBF Fatubesi (1), EBF Lumluli (4), EBF Roslau (3), EBF Fleixa (4).
Kona-ba prosesu pagamentu salariu ba profesór destakadu sira, Patrício da Costa, informa nia parte orienta ona superintendente no dirijente eskola sira atu submete ona relatóriu servisu profesór sira-nian nune’e bele hetan ona pagamentu.
“Ha’u ko’alia ona ho xefe superintendente sira Munisípiu Ainaro nian hodi informa ba eskola sira atu submete ona relatóriu profesór foun ne’ebé foin koloka,”nia hateten.
Iha biban hanesan, Diretora Nasionál Rekursu Umanu, Anita Tavares, hatutan Ministériu Edukasaun (ME) oras ne’e sei hein hela relatóriu hosi munisípiu sira atu nune’e bele prosesa ona sira-nia salariu iha tempu badak.
“Ami hein de’it relatóriu hosi eskola sira hotu ne’ebé ita koloka ona profesór bá. Ita tenke prosesu ona maibé tenke submete mós ho lista prezensa profesór sira-nian,tanba ita lahatene sira tama ka lae,” Diretora ne’e dehan.
“Ohin 01 jullu ona entaun tenke submete ona dadus profesór foun sira hodi Itá prosesa ona, nune’e pagamentu bele la’o ona,” nia hatutan.
Maske destaka ona profesór iha terrenu, maibe akontese eskola balun daudaun ne’e, manorin destakadu sira seidauk ativu hodi hanorin estudante sira ho rajaun maka gravida no oan sei kiik.
Entertantu, Ministériu Edukasaun iha fulan-maiu liubá destaka ona profesór ba eskola 330 iha territóriu nasionál.
Jornalista : Osória Marques
Editór : Agapito dos Santos
