DILI, 02 Jullu 2024 (TATOLI) – Eletrisidade de Timor-Leste, Empreza Públika (EDTL,E.P) ne’ebé kontrata empreza CNI22 JV Shenzhen Clou husi Xina hodi halo instalasaun ba sistema pré-pagu foun ba kliente sira ne’e daudaun atinje ona 90%.
Komisáriu Ezekutivu Servisu Tékniku EDTL,E.P, Latino Jerónimo, dehan iha fulan-Agostu 2023, EDTL,E.P hahú atualiza sistema pré-pagu foun ba kliente sira husi Standard Transfer Specification (STS 1) ba STS II, iha territóriu ho forma fazeadamente, ne’ebé hahú ona iha Liquiçá.
“Ami hato’o deskulpa ba públiku relasiona ho situasaun foin lalais iha postu venda sira. Sistema atendimentu ba pulsa eletrisidade la la’o ka todan, tanba kauza husi falla téknika ita-nia network fó impaktu ba ligasaun ba internét. Tráfiku barak halo atendimentu ba públiku ne’e lentu, maibé ita rezolve ona no daudaun iha postu venda la’o normál fali. Iha tempu badak situasaun sei la’o normál tanba instalasaun ba sistema pré-pagu foun ba kliente sira daudaun atinje ona 90%”, Latino Jerónimo hateten iha Caicoli, Dili, ohin.
Instalasaun ba sistema pré-pagu foun ba kliente sira falta de’it 10% atu konklui, tanba husi 10% ne’e sira seidauk hetan apoiu EDTL, E.P hodi dezenvolve aplikasaun online sira ne’ebé fa’an pulsa no seluk tan.
“Maibé, bainhira sira finaliza ona postu venda sira sei la’o di’ak hotu. Daudaun. ita sei halo situasaun sira ne’e nu’udar falla téknika no ida ne’e sei iha faze implementasaun projetu ne’ebé lansamentu ba pré-pagu foun ba kliente sira ka instalasaun fornesimentu kontadór sistema ne’e bainhira hotu sei entrega mai ita rasik mak jere”, nia salienta.
Aleinde ne’e, hahú aban ekipa téknika husi empreza CNI22 JV Shenzhen Clou sei to’o iha Timor-Leste atu fó formasaun ka treinamentu ba pesoál tékniku na’in-hitu husi EDTL, E.P kona-ba network, infraestrutura no seluk tan atu projetu ne’e bainhira finaliza no entrega sira mak sei halo operasaun rasik.
Notísia relevante : https://tatoli.tl/2023/07/19/edtl-e-p-sei-instala-pre-pagu-foun-iha-tempu-badak/
Instalasaun fornesimentu kontadór sistema ka sistema pré-pagu foun ba kliente sira ne’e, EDTL kontrata empreza CNI22 JV Shenzhen Clou ho montante millaun $4,89.
Jornalista: Arminda Fonseca
Editora: Maria Auxiliadora
