DILI , 03 jullu (TATOLI)–Diretora Nasionál Rekursu Umanu, hosi Ministériu Edukasaun, Anita Tavares, hateten nia parte seidauk halo pagamentu kona-ba orsamentu subdisiu no transporte ba kargu xefia sira tanba laiha orsamentu sufisiente ne’ebé maka alokadu ba item rua ne’e.
“Governu nafatin selu, labele hanoin dehan tinan kotuk ami asume kargu maibé tinan ne’e laiha, keta la hetan direitu ona karik, ida ne’e laiha. Ami nafatin konsidera tanba dadus iha,” nia dehan hato’o asuntu ne’e hodi hatán ba ejizénsia ne’ebé hato’o hosi Eis Diretór Eskola Sekundária Jerál 4 de Setembru, Balide, Martinho de Menezes.
Notísia Relevante :Manorin sira simu ona subsídiu transporte
Nia dehan, atu rezolve asuntu ne’e maka nia parte persiza prepara proposta foun hodi aumenta orsamentu ba item rua ne’e nune’e bele selu kargu xefia sira ne’ebé maka durante tinan ida ona seidauk simu sira-nia diretu maske hala’o ona sira-nia responsabilidade.
Iha tinan 2023 liubá, Ministériu Edukasaun halo ona pagamentu ba kargu xefia iha territóriu nasionál hamutuk 1.927, sira ne’e maihosi munisípiu Aileu 133, Ainaro 14, Baucau 459, Bobonaro 71, Covalima 326, Dili 244, Ermera 16, Liquiça 18, Lautém 270, Manatuto 161, Manufahi 59 no Viqueque 156.
Enkuantu, iha tinan 2022 halo ona pagamentu hamutuk 2.306, kompostu hosi munisípiu Aileu 98, Ainaro 151, Baucau 380, Bobonaro 115, Covalima 73, Dili 306, Ermera 47, Liquiça 518, Lautém 308, Manatuto 94, Manufahi 113 no Viqueque 103.
Eis Diretór ESJ 04 Setembru Balide Dili, Martinho de Menezes, hateten durante tinan ida ona seidauk simu subsidiu no orsamentu transporte ne’e, maibé lamenta tebes maka kargu xefia foun sira foin asume responsabilidade de’it no Ministériu Edukasaun halo ona pagamentu ba sira.
“Ami ladún kontente, tanba lei ida ba subsidiu kargu xefia nian ne’e vigór iha 31 Maio de 2023, tuir loloos ami ne’e hetan tiha ona, mais to’o ohin loron ami la hetan agora kolega sira ne’ebé mak foin tama subtitui ami ne’e hetan kedas pagamentu, tanba ne’e mak ami ladún satisfaz ho ida-ne’e, ne’ebé ami husu ba ME atravez rekursu umanu atu esplika took mai ami katak nia problema ne’e iha ne’ebé, mak ami nia seidauk halo pagamentu kolega foun sira halo uluk ona pagamentu,”nia hato’o lamentasaun ne’e iha edifisiu Ministériu Edukasaun, Villa-Verde Dili, kuarta ne’e.
Nune’e mós Eis Diretór ESTV 28 Novembru Dili, Manuel Amaral, hateten to’o agora seidauk simu subsidiu ne’e maske ninia mandatu termina ona hanesan diretór eskola.
“Hahú iha loron 30 de juñu 2023 to’o iha loron 30 juñu 2024 ne’e ba tinan ida nian ona, ne’ebé ami seidauk hetan pagamentu,” nia kestiona.
“Ami mai fulan kotuk, semana kotuk, horseik no ohin ami mai iha ne’e atu mai konfirma ba rekursu umanu kona-ba ami-nia osan kargu xefia nia ho transporte no kargu xefia nian. Maibé ami mai la konsege hasoru diretóra rekursu umanu, tanba dehan nia okupadu ho servisu seluk, maibé ami sei tenta mai nafatin hodi husu tanba ne’e ami nia direitu,” nia dehan.
Entertantu, Governu aprova subsídiu ba kargu xefia sira kada fulan ida, $310 no orsamentu ba transporte $75.
Notísia Relevante :Edukasaun aloka millaun $2,1 ba subsídiu transporte no pagamentu realiza iha novembru
Jornalista: Osória Marques
Editór : Agapito dos Santos
