DILI, 05 jullu 2024 (TATOLI) – Komandante Eskuadra Dom Aleixo, Inspetór Xefe Polísia, Alexandrino da Costa (Alex Samurai), dehan Departamentu Investigasaun Kriminál (DIK) Nasionál halo ona identifikasaun ba traballadór sira, iha ne’ebé, prepara hahán ba Ministru Komérsiu no Indústria (MCI) Filipus Nino Pereira.
“Sim, horseik, depois akontesimentu ida-ne’e iha kargu xefia balun telefone ha’u no ha’u ho ekipa ba kedan iha fatin akontesimentu no ami halo kedan atuasaun ba sasan sira inklui asegura traballadór sira Timor Plaza ne’ebá, iha ne’ebé prepara hahán ba ita-nia ministru. Kazu ne’e ita entrega ona ba Departamentu Investigasaun Kriminál Komandu Jerál hodi prosesa no kazu ne’e agora iha hela prosesu identifikasaun”, Inspetór Xefe Polísia, Alexandrino da Costa, dehan ba jornalista sira hafoin halo diálogu ho estudante eskola Sekundária Jerál Finantil iha Ai-Mutin, sesta ne’e.
Rekorda fali katak kazu ne’e akontese iha kinta (4/7) horseik iha tuku 10:00 dader, bainhira, Ministru Komérsiu no Indústria Filipus Nino Pereira, partisipa semináriu ho tema Visualizasaun Internu MCI entre oportunidade no dezafiu governasaun integrasaun Globál-Rejionál, iha Timor Plaza, hafoin seminariu, pauza ba kafé dader, Ministru ho partisipante sira hakbesik ba meja hodi foti dose hodi hán.
Bainhira governante ne’e foin hán dose bandeira ne’ebé traballadór Timor Plaza prepara, derepente ministru konsumu kona fali frasku ka butir rahun ne’ebé mak iha fali ai-han merenda ne’e nia laran.
Ho akontesimentu ne’e, rezulta governante ne’e ibun laran kanek no tafui ran. Ho insidente ne’e, halo ema pániku no halo diretór sira ne’ebé akompaña Ministru Nino iha momentu ne’ebá, telefone kedan Polísia no Komandante Eskuadra Dom Aleixo, Inspetór Xefe Polísia, Alexandrino da Costa ho ekipa to’o kedan fatin akontesimentu hodi haree no halo kedan atuasaun ba insidente ne’e.
Nia dehan, polísia halo nia kna’ar tuir lei no orden, kuandu kazu ruma akontese tenke prosesa.
“Ha’u hanoin iha prosesu ida sempre ita bolu ema hodi halo identifikasaun, tanba sá no oinsá. Ba kazu ida-ne’e ami entrega ona ba Departamentu Investigasaun, ne’ebé ha’u laiha tán komentáriu naruk kona-ba ida-ne’e”, nia afirma.
Notísia relevante : Ministru Nino konsumu ai-han ne’ebé kontamina ho frasku
Ministru Nino rekupera ona hafoin konsumu ai-han ne’ebé kontamina ho frasku
Jornalista: Natalino Costa
Editór : Zezito Silva
