ALFeLa husu MJ fasilita sertidaun RDTL ba labarik menór abandonadu
DILI, 08 jullu 2024 (TATOLI)–Sekretaria Estadu Igualdade (SEI) organiza enkontru ba daruak nian ho Rede Referál atu korrdena advokasia luta ba violénsia kontra feto no labarik sira inklui halo prevensaun la kontra Violénsia Bazeia ba Jéneru (VBJ) ba feto no labarik iha Timor Leste.
Enkontru ne’e entre SEI ho nia parseru sira hotu ne’ebé maihusi liña ministeriál inklui sosiedade sivíl no parseru internasionál ne’ebé haknaar-an iha área prevensaun ka kontra violénsia bazeia ba jéneru.
Biban ne’e, Asisténsia Legál ba Feto no Labarik (ALFeLa) husu ba Ministériu Justisa (MJ) atu fasilita sertidaun RDTL ba labarik menór ne’ebé abandonadu.
“Ita atu trata de’it labarik menór abandonadu nia sertidaun sai problema, tanba tuir esperiénsia ne’ebé iha hatudu katak labarik menór sai maiór mós seidauk bele rezolve tanba de’it bainhira hasai RDTL ita-nia kliente la hatene mane ne’ebé fó oan nia naran,” Diretora ALFeLa, Marcelina Amaral, informa durante sorumutuk entre membru Rede Referál iha salaun Maria Gorete Sekretaria Estadu Igualdade (SEI), iha Obrigado Barak Caicoli, segunda ne’e.
Nia nota katak, fásil liu trata sertidaun RDTL iha munisípiu tanba MJ bainhira simu deklarasaun husi suku bele prosesa ona.
“Iha nasionál ne’e komplikadu tebes tanba husu dokumentu dupla, aleinde RDTL, husu mós sertidaun óbitu. Tanba ne’e husu ba Ministériu Justisa liuhusi Diresaun Notariadu nian atu marka prezensa mós iha enkontru entre membru Rede Referál sira, nune’e bele anota direitamente ba asuntu ida-ne’e,” nia akresenta.
Notísia relevante : ALFeLa disponibiliza formasaun kona-ba enkuadramentu legál violénsia kontra feto ba AES-PNTL Covalima
Iha biban hanesan, Reprezentante Organizasaun Ajudu Umanitáriu, United Nations Children’s Fund (UNICEF), Domingos da Costa Sousa, relata, bazeia ba dadus ne’ebé rekolla bainhira serbisu besik MJ, hatudu katak iha labarik menór 90% rejistadu.
“Ami apoiu direita MJ ba haforsa rejistu sivíl, liu-liu sertidaun moris ba labarik ho idade lima mai kraik, ida-ne’e signifika katak rezultadu esforsu no rejistadu iha Notariadu,” nia tenik.
Diretór Jerál iha Sekretaria Estadu ba Igualdade (SEI), Armando da Costa, hateten, SEI nia objetivu organiza sorumutuk daruak ba tinan 2024 nian hodi membru Rede Referál sira bele relata problema oin-oin.
“Ezemplu ida mak ohin membru Rede Referál sira relata kona-ba edukasaun fila hikas, zero violénsia iha eskola sira no labarik menór abandonadu asesu ba RDTL. Husi kestaun hirak ne’e mak ohin sira rekomenda hodi parte relevante sira hanesan Diresaun Notariadu, Justisa, no Edukasaun atu marka prezensa mós iha sorumutuk ba datoluk nia iha fulan-outubru nune’e bele rona direita saida mak Rede Eeferál sira relata husi rezultadu monitorizasaun iha terrenu,” nia dehan.
Jornalista : Osória Marques
Editora : Julia Chatarina
