iklan

EKONOMIA, INTERNASIONÁL, DILI, HEADLINE

Adere ba ASEAN, Indonézia promete apoia reforsa preparasaun TL iha área ekonomia

Adere ba ASEAN, Indonézia promete apoia reforsa preparasaun TL iha área ekonomia

Primeiru-ministru, Kay Rala Xanana Gusmão, hala'o enkontru ho Indonesia ASEAN Senior Officials Meeting (SOM) Leader, Embaixadór Sidharto Reza Suryodipuro, iha Palásiu Governu, segunda (09/07). Imajen Tatoli/Francisco Sony

DILI, 09 jullu 2024 (TATOLI)– Estadu Indonézia fó apoiu másimu hodi reforsa preparasaun Timor-Leste (TL) nian iha área ekonomia ne’ebé sai hanesan pilár importante ida atu adere bá organizasaun Rejionál Association of Southeast Asian Nations (ASEAN).

Ekipa hosi Indonézia ne’ebé ho kompromissu kontinua fó apoiu preparasaun TL iha área akonomia, lidera hosi atuál Diretór Jerál Asuntu Kooperasaun ASEAN iha Ministériu Relasaun Exteriór Indonézia, hanesan mós membru Senior Officials Meeting (SOM) ASEAN, Sidharto Reza Suryodipuro hamutuk ho delegasaun hasoru-malu ho Primeiru-Ministru (PM), Kay Rala Xanana Gusmão hodi hato’o vizaun no rona mós vizaun Governu Timor-Leste nian bá asuntu ekonomia iha prosesu integrasaun bá ASEAN.
Primeiru-Ministru, Kay Rala Xanana Gusmão, hala’o enkontru ho Indonesia ASEAN Senior Officials Meeting (SOM) Leader, Embaixadór Sidharto Reza Suryodipuro ho nia ekipa, iha Palásiu Governu, segunda (09/07). Imajen Tatoli/Francisco Sony

“Ha’u hamutuk ho delegasaun mai hasoru-malu ho Primeiru-Ministru atu haree prosesu no progresu preparasaun Timor-Leste nian bá ASEAN liu-liu iha pilár ekonomia. Hato’o ami-nia vizaun no rona mós   vizaun Timor-Leste nian kona-bá kooperasaun ASEAN nian iha área ekonomia,” Sidharto Suryodipuro hateten hafoin remata enkontru ho PM Xanana.

Nia dehan, Indonézia fó apoiu másimu hodi reforsa preparasaun Timor-Leste nian iha área ekonomia ne’ebé sai hanesan pilár importante ida atu adere bá ASEAN.

Membru Senior Officials Meeting (SOM) ASEAN haree katak, Timor-Leste sai ona membru ASEAN bazeia bá desizaun ne’ebé foti iha tinan 2022 no daudaun iha roteiru ne’ebé guia TL atu sai membru plenu ho pilár tolu mak hanesan, pilár polítika no seguransa, ekonomia, sosiál no kultura.

Hosi roteiru ne’ebé iha, pilár ekonomia ninia indikadór barak mak tenke kumpri, tanba ne’e tenke servisu makás no lalais atu realiza duni iha tempu tuir-mai.

Delegasaun ne’e mós sei hasoru-malu ho membru IX Governu ne’ebé lidera asuntu ekonomia nian.

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!