OÉ-CUSSE, 12 jullu 2024 (TATOLI) – Institutu Nasionál Kombate HIV-SIDA, Institutu Públiku (INCSIDA,IP), sesta ne’e kontinua halo sensibilizasaun ba problema transmisaun virus HIV-SIDA ba estudante sira iha Ensinu Sekundáriu Katólika Santo António, Rejiaun Administrativa Espsiál Oé-Cusse Ambeno (RAEOA).
Notísia relevante: INCSIDA husu Oé-Cusse oan hamutuk kombate tranzmisaun VIH/Sida
Diretór Programasaun INCSIDA, IP, Silvestre da Costa Sarmento, informa, objetivu prinsipál husi sensibilizasaun ne’e, atu hasa’e koñesimentu estudante sira atu hadok-aan no prevene-aan husi hosi virus HIV-SIDA.
“Ita hakarak eleva no hasa’e koñesimentu ba estudante sira, tanba dadus hatudu idade 15 to’o 24 iha 500-resin maioria joven sira mak hetan virus HIV-SIDA, ita nafatin husu joven no estudante sira prevene-an husi moras HIV-SIDA,” Silvestre da Costa Sarmento, ko’alia iha salaun igreja Numbei.
Tuir nia, tanba labarik idade husi 15 to’o 24 ne’e maioria sei iha eskola, entaun papél INCSIDA mak hanesan prevensaun primária ida, tán ne’e halo sensibilizasaun atu hasa’e sira-nia koñesimentu nune’e bele hadook-aan husi risku ba HIV-SIDA.
Nia enkoraja estudante sira atu simu matéria ne’ebé aprezenta bele sai iha prátika loro-loron nian, tanba Timor-Leste presiza joven sira hanesan futuru nasaun nian, tenke moris ho saudável no livre husi transmisaun moras hada’et sira.
Notísia relevante: Janeiru-jullu 2024, RAEOA rejista kazu VIH/SIDA 12
Arcelindo da Cunha Bobo, nu’udar Profesór Konsellu Estudante, agradese tanba sensibilizasaun ne’e bele eleva estudante sira-nia kapasidade kona-bá problema no impkatu husi transmisaun virus HIV-SIDA.
“Ita haree estudante sira idade ne’e merese atu atu aprende atu hatene, alende ami hanorin balu iha eskola, fiar katak bele kompleta liután, nune’e estudante sira bele habelar tutan ba família, tanba joven labele sai vítima ba moras ne’e,” nia fó hanoin.
Estudante Domingos da Cruz, sente kontente ho sensibilizaun ne’e, tanba bele fanun sira hosi prevene-aan husi transmisaun virus HIV-SIDA.
“Ami sente kontenti tebes, tanba sensibilizasaun ne’e ami bele aprende tanba ita hatene kazu Oé-Cusse ne’e sa’e maka’as ba 73, depois Oé-Cusse rai enklave haleu husi nasaun viziñu movimentu ema tama sai, entaun moras ne’e fasil bele tama, entaun ho sensibilizaun ne’e bele ajuda ami atu hatene,” nia orgullu.
Notísia relevante: INCSIDA kontinua divulga informasaun kona-ba tranzmisaun VIH/Sida iha suku Cunha
Tuir dadus husi serbisu saúde Oé-Cusse daudaun ne’e rejista ona virus HIV-SIDA hamutuk ema na’in-73, na’in-17 mak lakon ona vida. Dadus iha territóriu nasionál to’o marsu 2024 ne’e rejista ona ema 2.042.
Jornalista: Abílio Elo Nini
Editór: Evaristo Soares Martins
