OÉ-CUSSE, 11 jullu 2024 (TATOLI) – Hahú husi fulan-janeiru to’o fulan jullu 2024 ne’e, serbisu saúde Rejiaun Administrativa Espesiál Oé-Cusse Ambeno (RAEOA) rejista kazu ema moras ho virus VIH/SIDA hamutuk ema na’in-12.
“Kazu 12, ne’e ita rekolla liuhusi teste raan iha laboratóriu mak deteta, tan ne’e ohin ami mai fahe informasaun ba inan-aman sira liuliu joven atu hamutuk hodi prevene transmisaun ne’e iha Oé-Cusse ” Koordenadór VIH/SIDA Oé-Cusse, Celia Rosa Martins Bobo, ko’alia iha ámbitu sensibilizasaun moras VIH/SIDA iha suku Lalisuk, kinta ne’e.
Notísia relevante: Kazu infetadu HIV-SIDA iha Oé-Cusse sa’e ba 60
Nia relata, tinan hirak liuba, Oé-Cusse rejista de’it kazu 10 maibé to’o 2024 rejista ona kazu 73, husi númeru ne’e, na’in-17 konsege lakon vida tanba lakohi koopera ho fasilidade saúde atu hetan tratamentu.
“Kazu segredu, ha’u-nia família mós sira lahetene, só ha’u de’it mak hatene katak, ema ne’e sofre moras HIV-SIDA,” nia katak.
Diretór Programasaun INCSIDA, IP, Silvestre da Costa Sarmento, informa, sensibilizasaun ne’e alvu ba komunidade liuliu joven sira, atu hatene kona-bá moras hada’et relasaun seksuál no tráfiku umanu.
Tanba iha Timor-Leste kazu VIH/SIDA, Ministériu Saúde rejista husi 2003 to’o marsu 2024 ne’e hamutuk 2.042,
“Ohin ami mai iha-ne’e, atu hamutuk proteje Oé-Cusse husi transmisaun virus VIH/SIDA, Oé-Cusse komesa kazu sa’e ba 73, husi númeru ne’e 17 mak mate ona, tan ne’e sei númeru ne’e ita la kombate hodi hamenus entaun moras ne’e kontinua aumenta ba beibeik,” nia dehan.
Notísia relevante:INCSIDA husu Oé-Cusse oan hamutuk kombate tranzmisaun VIH/Sida
Tuir nia, sé kada loron ema ida kontaktu ho ema 10 ba leten, moras ne’e sei sa’e maka’as iha Oé-Cusse, tanba kompara ho antes ne’e númeru menus maibé daudaun komesa sa’e ona ba 73.
“Presiza hamutuk la’ós papél INCSIDA, no Ministériu Saúde de’it, maibé ita hotu nia responsabilidade tanba virus ne’e, kuandu ataka, ita-nia imunidade fraku fó espasu ba moras seluk mós bele ataka ita-nia imunidade no bele lakon vida,” nia f’o hanoin.
Xefe aldeia Manuimpena, Herculano Casenube, rekomenda ba Ministériu Saúde no INCSIDA atu kontinua kontinua sensibiliza ba iha nível suku, atubele fanu ema hotu iha suku ida-idak liuliu iha área rurál, sira bele komprende.
“Nu’udar autoridade lokál ami-nia kontribuisaun mak ne’e, ohin ami mobiliza komunidade mai, depois sira-ne’e ohin la marka prezensa ami sei informa tutan, nune’e bele hatene tanba moras ne’e perigu tebes ba ema hotu nia vida, ami espera informasaun sira-ne’e bele hala’o sensibilizasaun to’o suku tanba kazu ne’e komesa sa’e maka’as ona, ita labele nonok,” nia rekomenda.
Notísia relevante: INCSIDA kontinua divulga informasaun kona-ba tranzmisaun VIH/Sida iha suku Cunha
Jornalista: Abílio Elo Nini
Editór: Evaristo Soares Martins
