DILI, 18 Jullu 2024 (TATOLI) – Ministériu Agrikultura, Pekuária, Peska no Floresta (MAPPF) daudaun ne’e analiza hela atu halo empréstimu millaun $50 husi Governu Koreia hodi halo konstrusaun ba portu peskeira iha Com, Lautém.
Ministru Agrikultura, Pekuária, Peska no Floresta, Marcos da Cruz, konsidera konstrusaun portu ne’e importante no sai fatór ida determinante ba rendimentu no produsaun ikan iha nasaun, maibé ministériu mós tenke halo uluk análize hodi haree vantajen no dezvantajen husi polítika empréstimu ne’ebé Governu Koreia oferese.
“Ha’u simu ona input lubuk ida husi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente ne’ebé husu atu halo desizaun ho didi’ak ba polítika parseiru dezenvolvimentu husi Koreia nian kona-ba fundu millaun $50 ne’ebé atu konstrui portu Com”, governante hato’o asuntu ne’e iha enkontru ne’ebé hala’o iha salaun MAPPF, Comoro, ohin.
Nia adianta katak Governu koreanu iha ona planu atu konstrui portu rua, ida iha Mauboke-Liquiçá no seluk iha Com-Lautém. Ba portu Mauboke Koreia oferse fundu ho gratuita hamutuk millaun $4,8, maibé ba portu Com sira sei fó empréstimu millaun $50-resin.
Governante ne’e afirma katak planu konstrusaun portu rua ne’e ninia prosesu kona-ba estudu viabilidade remata ona no hein de’it ninia dezeñu detalladu. “Depois halo aprezentasaun, kuandu konkorda ona maka foin bele asina kontratu ba konstrusaun ne’e, tanba konstrusaun portu rua ne’e KOICA mak sei responsabiliza, katak ekipa téknika no traballadór sira mai hotu husi Koreia”, informa.
Diretór-Jerál Peska, Celestino da Cunha Barreto, realsa katak ba konstrusaun portu rua ne’ebé tama ona iha planu ne’ebé sei realiza husi Governu Koreia ne’e sei inklui mós ho apoiu ró 10. Kada ró sei iha ninia kapasidade 30 GT. Ró sira ne’e sei utiliza iha portu rua ne’e atu apoiu atividade peskadór sira-nia hodi hasa’e liután produsaun ikan iha tasi-laran.
Diretór ne’e dehan MAPPF, durante ne’e, iha ona planu atu konstrui mós portu peskeira iha Dili, iha suku Duyung-Metinaro. Planu ministériu nian atu konstrui portu ne’e, tanba konsidera nu’udar fatór importante hodi bele hasa’e produsaun ikan no bele apoia mós peskadór sira-nia atividade.
Portu peskeira ne’ebé lokaliza iha Metinaro ne’e nia orsamentu mai husi Fundu Infraestrutura. “Prosesu kona-ba estudu viabilidade hahú ona iha 2010 no 2014. Buat hotu kompletu ona, inklui dezeñu detalladu ne’ebé mai ho nia totál orsamentu hamutuk millaun $55. Maibé, nia prosesu sei naruk, tanba ministériu kontinua hein atu hetan rezultadu ba konstrusaun ne’e hodi fó espasu ba Diresaun Peska implementa programa sira ne’e”, salienta.
Notísia relevante: Parlamentu Nasionál ratifika Akordu kona-ba Subvensaun ba Peska
Jornalista: Tomé Amado
Editora: Maria Auxiliadora
