Embaixada neen iha Timor-Leste selebra Loron Família ASEAN

DILI, 20 Jullu 2024 (TATOLI) – Embaixada Brunei Darrusalam, Indonézia, Malázia, Filipina, Singapura no Tailándia ne’ebé nia reprezentante iha Timor-Leste selebra Loron Família Asosiasaun Nasaun Sudeste Aziatiku (ASEAN) iha ámbitu aniversáriu ASEAN ba da-57 ne’ebé monu iha loron 08 fulan-Agostu.

Selebrasaun data ne’e partisipa husi komunidade ASEAN iha Timor-Leste besik ema 100-resin ne’ebé realiza iha Timor Lodge, Dili.

Iha ámbitu komemorasaun loron ne’e organiza atividade sira mak hanesan korrida bisikleta, la’o ain, jogu futsal, voleiból, badminton, ténis no han meiu dia hamutuk. Aleinde ne’e, iha mós aprezentasaun dansa no múzika Timór nian no aprezentasaun vestuáriu kultura Timor-Leste nian.

Embaixadór Indonézia iha Timor-Leste, Okto Dorinus Manik, dehan selebrasaun Loron Família ASEAN ne’e atu halibur komunidade ASEAN nian ne’ebé hela iha Timor-Leste.

“Ida ne’e eventu dahuluk husi embaixada sira ASEAN atu selebra Loron Família ASEAN husi nasaun neen ne’ebé iha Timor-Leste. Ida ne’e hanesan eventu unidade no amizade ba komunidade”, Okto Dorinus Manik dehan ba jornalista sira.

Iha fatin hanesan, Embaixadór Malázia iha Timor-Leste, Amarjit Sarjit Singh, realsa katak atividade ida ne’e atu reforsa relasaun maun-alin entre embaixada ASEAN iha Timor-Leste, inklui timoroan sira.

“Normalmente, ita iha kooperasaun bilaterál, maibé ida ne’e ba to’o iha komunidade ASEAN iha Timor-Leste. Atividade ida ne’e pozitivu tebes. Ita bele halibur hamutuk ho atividade furak no bele konversa hanesan maun-alin”, Amarjit Sarjit Singh hatutan.

Iha sorin seluk, Diretora-Jerál ba Asuntu ASEAN, Elisa Maria da Silva, dehan partisipasaun iha atividade ne’e atu hatene lala’ok ASEAN bainhira atu tama ba organizasaun karik hatene ona eventu sira ne’e.

“Ida ne’e ita atu hatene kultura komunidade ASEAN. Hanesan ita hotu hare iha atividade jinástika no aprezentasaun dansa”, nia konklui.

Jornalista: Jesuína Xavier

Editora: Maria Auxiliadora