Estudante na’in-haat tuir olimpíada Matemátika iha Portugal
DILI, 23 jullu 2024 (TATOLI)–Estudante na’in-haat husi Centro e Formação e Aprendizagem Escolar (CAFE) Dili, CAFE Aileu, Eskola Ensinu Sekundáriu Jerál 05 de Maio no Eskola Colégio Santo Inácio Loiola Casait Liquiçá nian, tuir olimpíada Matemátika ba dala-12, ne’ebé sei realiza iha loron 23 to’o 28.
Eventu ne’e sei realiza iha Eskola Bázika no Sekundária Luís de Freitas Branco, em Paço D´Arcos, Portugal, ne’ebé organiza husi munisípiu Oeiras, CPLP no Sosiedade Portugeza Matemátika (SPM).
Diretór Jerál Ensinu Sekundáriu iha Ministériu Edukasaun (ME), Deolindo da Costa, hateten, estudante sira arranka ona no daudaun ne’e to’o ona iha destinasaun.
“Estudante na’in-haat mesak feto, ne’ebé bá tiha ona iha sábadu (20/07) no sira iha tiha ona Portugal hodi kompete iha nível Comunidade Países da Língua Portuguesa (CPLP) nian. Espera katak sira-na’in haat bele hatudu rezultadu di’ak iha olimpíada referidu,” Deolindo da Costa, informa ba Agência Tatoli, iha ninia knaar fatin, Vila Verde, tersa ne’e.
Notísia relevante : Japaun no UNESCO entrega Laboratóriu Siénsia no Matemátika sia ba MEJD
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, husu ba estudante na’in-haat ne’ebé reprezenta estudante timoroan hodi tuir kompetisaun, atu hatudu rezultadu di’ak.
“Ne’e hanesan motivasaun ba estudante sira seluk hodi estuda badinas atubele kompete ho ema seluk. Tanba ne’e, agradese ba inan-aman no profesór sira ne’ebé durante ne’e uza métodu di’ak iha prosesu ensinu nian,” Sekretáriu Estadu louva.
Governante ne’e otimista katak estudante na’in-haat ne’ebé reprezenta Timor-Leste ne’e sei hatudu valór di’ak no hatudu vontade di’ak, nune’e tuir kompetisaun ho susesu.
Jornalista : Osória Marques
Editora : Julia Chatarina
