DILI, 24 jullu 2024 (TATOLI) – Aniversáriu Ajénsia Notisioza Timor-Leste ba dala-ualu, Hospitál Nasionál Guido Valadares (HNGV) husu jornalista sira tenke servisu ho profisionál hodi hato’o notísia ne’ebé di’ak ba ema hotu.
Diretór Servisu Apoiu Diagnóstiku no Terapeútiku, iha HNGV, Vidal de Jesus Lopes, hateten lori Konsellu Diretivu HNGV nia laran hato’o parabens ba TATOLI ne’ebé halo tinan ba dala- ualu.
“Em nome konsellu diretivu HNGV, hato’o parabens ba TATOLI, ne’ebé halo tinan ba dala-ualu atu kontinua servisu ho profisionál no imparsiál hodi hato’o notísia ne’ebé di’ak ba povu hotu ne’ebé mak asesu ba notísia sira ne’e, hodi kontribui ba dezenvolvimentu iha ita-nia rain”, Vidal de Jesus Lopes, informa ba TATOLI iha nia kna’ar fatin HNGV, Bidau Tokobaru ohin.
Nia dehan, TATOLI nafatin habelar informasaun ba povu tomak iha prosesu dezenvolvimentu rai ida ne’e nian.
“Husu ba TATOLI atu nafatin hablear informasaun ba povu tomak hanesan media TATOLI ne’ebé hola parte iha prosesu dezenvolvimentu liuhosi ita boot sira-nia papel hodi foti informasaun ne’ebé mak ho maneira investigativu, atu nune’e hato’o informasaun lolos ba povu tomak hodi bele absolve no asesu nafatin prosesu dezenvolvimentu ne’ebé mak lao iha ita-nia rain”, nia relata.
Nia hato’o rekomedasaun ba TATOLI atu nafatin servisu ho di’ak, hodi garante kualidade notísia iha rai laran inklui mós iha rai liur.
Jornalista : Felicidade Ximenes
Editór : Zezito Silva
