Governu prepara ona fatin faan ikan-naan iha merkadu Manleuana
DILI, 24 jullu 2024 (TATOLI)–Jestor merkadu Maneleuana, Saturnino Henrique de Fátima, hateten Governu prepara ona fatin ba faan ikan no naan ba negosiante sira, maibé presiza kompleta ho konjeladór.
Notísia Relevante: Governu aloka rihun $10 reabilita merkadu Manleuana
“Iha reabilitasaun ne’e ba fatin faan ikan no naan ne’e presiza tan jelera no konjelador hamutuk rua. Ida-ne’e sei sosa hosi Ministériu Agrikultura no Peska liuhosi empreza balun,” Jestor merkadu Maneleuana, Saturnino Henrique de Fátima, hateten ba Agência Tatoli, liuhosi telefónika, kuarta ne’e.
Nia dehan, merkadu Manleuana iha armajen ne’ebé prepara hela ba vendedór sira, agora iha hela konjeladór no jelera haat no hein hela sasán ne’e foun rua.
Tuir nia, jestaun merkadu no Autoridade munisipál no Governu presiza kria kondisaun di’ak uitoan atu bele muda ba vendedór sira ba iha Manleuana.
“Fatin ba faan ikan no naan ne’e iha rua ne’ebé kompostu hosi balkaun 20 ba iha negosiante sira,” nia dehan.
Jestor ne’e hateten, agora iha hela faze preparasaun, antes autoridade munisipál muda negosiante sira faan ikan no naan ba merkadu Manleuana.
“Governu prepara hela no entrega ba jestaun merkadu, antes muda ba iha ne’ebá,” nia hateten.
Saturnino Henrique de Fátima dehan armajen ba negosiante sira-ne’e atu rai ikan no naan sira-ne’ebé faan, bainhira ema la sosa hotu, sira bele ba rai iha armajen.
Notísia Relevante: Vendedór 368 mak fa’an provizoriamente iha merkadu Manleuana
Jornalista : Jesuína Xavier
Editór : Cancio Ximenes
