DILI, 26 jullu 2024 (TATOLI)–Universidade Nasionál Timor-Lorosa’e (UNTL) konsidera turizmu nu’udár dezenvolvimentu ekonomia sustentável ba Timor-Leste, nune’e hahú kapasita no eduka estudante sira atubele korresponde ba merkadu traballu iha área turizmu.
“Ohin loron Timor-Leste bele konsidera turizmu hanesan odamatan boot ida ba ita-nia dezenvolvimentu ekonomia, ita bele dehan turizmu hanesan sanak no rin ba dezenvolvimentu. Turizmu ne’e ita konsidera hanesan parte importante ida ba ita-nia dezenvolvimentu no ba kresimentu ekonómiku, tanba liuhusi área ospitalidade, otelaria, no servisu turístiku bele kria kampu traballu no oferese oportunidade serbisu ba ema hotu nune’e ikus akumula ema barak bá serbisu iha área referida,” Dekanu Fakuldade Turizmu Arte Indústria Kreativa no Kulturál iha UNTL, Feliciano Pinto hateten iha UNTL, sábadu ne’e.
Notísia relevante : Komunidade timoroan iha estranjeiru prontu promove turizmu interna ba mundu
Tanba ne’e, papél universidade nian mak eduka no prepara estudante hodi ikus mai bele korresponde ba merkadu traballu iha área turizmu.
“Ita-nia papél mak prepara, kapasita no eduka estudante sira, nune’e sira iha koñesimentu kle’an no iha kapasidade naton iha edukasaun ne’ebé kualifikadu liu no ikus mai bele prodús rekursu ne’ebé preparadu konfiável no kualidade. Iha tempu hanesam bele korresponde ba merkadu traballu, liu-liu iha área turizmu ninian,” nia akresenta.
Fakuldade Turizmu Arte Indústria Kreativa no Kulturál iha estudante hamutuk 2.010-resin, ne’ebé husi totál ne’e iha 427 mak gradua ona no hala’o ona serbisu iha sosiedade nia le’et iha setór privadu no públiku.
“Husi totál 2.010 ne’e mós balun la konsege kontinua tanba harii família, balun moras no balun bá serbisu iha rai seluk. Ne’e hanesan dezafiu boot ida mai universidade maibé ami sempre kontinua kontaktu nafatin liuhusi rede sosiál no balun bá direita. Tanba universidade nafatin kontinua fó oportunidade ba ema ne’ebé la ativu ona ne’e bele mai reinkrisaun hodi kontinua nia estudu to’o ramata,” nia tenik.
Fakuldade Turizmu Arte Indústria Kreativa no Kulturál iha departamentu ida mak hanesan Komérsiu no Turizmu, ho nia dosente permanente 11 no kontratadu neen inklui internasionál ida.
Ministru Ensinu Superiór Siénsia no Kultura, José Honorio da Costa Pereira Jerónimo, hateten, Governu Timor-Leste konsidera turizmu hanesan setór importante no bele fó kontribuisaun ba dezenvolvimentu ekonomia sustentável.
“Tanba ne’e iha UNTL agora loke fakuldade turizmu ida nomós iha nível ensinu superiór téknika sei loke kampus politéknika no turizmu. Politéknika ida-ne’e hanesan parte husi kolaborasaun ho Institutu Teknolojia Bandung ne’ebé ajuda halo dezeñu tékniku ne’ebé sei hahú nia implementasaun iha tinan 2025 mai,” nia dehan.
Jornalista : Osória Marques
Editora : Julia Chatarina
