Top

PNTL Dili arrekada reseita $38.608 durante fulan rua

Membru Polísia Nasionál Timor-Leste (PNTL), liuhusi Unidade Tránzitu, hala’o pasa revista ba dokumentu motorizada no karta kondusaun, iha estrada públiku parte Estádiu Munisipal Dili, segunda (18/06/24). Imajen Tatoli/ Francisco Sony

DILI, 30 Jullu 2024 (TATOLI) – Polísia Nasionál Timor-Leste (PNTL) munisípiu Dili arrekada, durante fulan rua, reseita hamutuk $38.608 ba kofre Estadu.

Komandante PNTL Dili, Superintendente Xefe Polísia Orlando Martins, dehan iha Juñu sira rekolla reseita husi infratór sira hamutuk $22.544 no Jullu $16.064.

“Fulan rua nia laran ne’e ita hasai ona billete hamuttuk 435 ba infratór sira, maibé 395 mak selu ona koima ba banku, sei falta na’in-40 mak seidauk selu”, Komandante PNTL ne’e dehan iha Caicol, ohin.

Orlando Martins salienta katak totál koima ne’ebé infratór sira seidauk selu ba kofre Estadu husi Juñu hamutuk $2.340 no Jullu $4.223.

Asidente iha Juñu no Jullu hamutuk 203

Aleinde ne’e, nia relata mós asidente tráfegu ne’ebé akontese iha Juñu hamutuk 119, husi totál kazu sira ne’e iha rua mak submete ba Ministériu Públiku tamba kazu ema mate. Depois, kazu 59 rezolve tuir família no 58 iha prosesu nia laran.

Iha Jullu, rejista asidente 84, iha ne’ebé kazu tolu mak submete ba Ministériu Públiku, tanba ema mate, 40 rezolve tuir família no 41 iha hela prosesu nia laran.

Totál kazu ne’ebé komando Polísia munisípiu Dili rejista hahú husi Janeiru to’o Jullu hamutuk 1.119.

Notísia relevante: PNTL Dili rejista krime 388, maioria iha Dom Aleixo

Jornalista: Tomé Amado

Editora: Maria Auxiliadora

Publisidade

Leave a Reply

Latest Post

error: Content is protected !!