DILI, 02 agusto 2024 (TATOLI) – José Ximenes hanesan Defeza husi Fuzitivu Arnolfo Teves, submete ona rekursu ba Tribunál Rekursu hodi kontesta desizaun Supremu Tribunál Justisa (STJ) ne’ebé deside atu halo estradisaun ba Arnolfo ba fali nia nasaun orijen Filipina.
“Ami hatama ona rekursu ba Tribunál Rekursu hodi kontesta desizaun Supremu Tribunál Justisa ne’ebé deside atu halo estradisaun ba ami-nia kliente Arnolfo ba fali nia nasaun orijen Filipina no rekursu ne’e, ami hatama iha sesta semana kotuk”, José Ximenes ba TATOLI via telefone, sesta ne’e.
Antigu Prokuradór Jerál Repúblika hateten, defeza aprezenta rekursu ho pontu lima
“Pontu lima ne’e ida mak pedidu estradisaun ne’ebé mak husi Governu Filipina haruka mai ita-nia Minitériu Públiku no Ministru Justisa uza lian inglés. Ami hanesan advagadu la aseita ida- ne’e porké Timor-Leste hanesan Estudu soberania ida ne’ebe iha língua Nasionál no língua ofisiál mak Portugés no Tetum”, dehan nia.
Nia afirma, Timor-Leste la deveia aseita pedidu estradisaun tanba Timor-Leste laos pertense bá Filipina, maibé país ida ne’ebe soberanu.
“Pedidu estradisaun ne’e tenke mai ho lian portugés tanba ita-nia lian ofisiál ne’e Portugés no Tetum no ida-ne’e liga ba kestaun soberania, ita tenke tane aas ida-ne’e”, nia adianta.
Pontu daruak segundu mak Timor-Leste ho Filipina laiha akordu estradisaun, maibé Filipina haruka karta estradisaun ba Governu Timor-Leste no pedidu estradisaun la ho baze legál ruma tuir lei kooperasaun internasionál no materia penál.
Pntu datoluk mak Autoridade Filipina fó garantia ba Arnolfo bainhira nia fila ba Filipina sei kumpre de’it pena tinan 20 no 40, ne’ebé dekreve ona iha akordu estradisaun ne’ebé antes ne’e Filipina haruka ona ba Governu Timor-Leste.
“Maibé situasaun sira ne’e hanesan garante ida ba ami-nia kliente de’it, tempu ruma Governu Filipina bele aplika fali pena de morte tanba sira-nia lei ne’e lao hanesan”, nia esplika.
Pontu dahaat mak Filipina la respeita ba prinsípiu akordu resiprosidade, tanba Timor-Leste no Filipina laiha akordu resiprosidade, maibé husi karta Governu Filipina nian hakarak obriga Timor-Leste atu aselera prosesu estradisaun Arnolfo ba Fiilipa.
Pontu dalima mak Defeza husu atu Tribunál tenke haree ba prinsípiu legalidade sira mak lei kooperasaun internasionál no materiál penál molok halo desizaun.
“Ita hein de’it tanba rekursu ami hatama ona, ha’u labele fundamenta buat balun tanba Supremu Tribunál Justisa iha prazu loron 30 para foti desizaun ba ami-nia rekursu”, nia konklui.
Notísia Relevante : Defeza Arnolfo sei submete, semana oin, rekursu hodi kontesta desizaun Tribunál
Jornalista: Natalino Costa
Editór : Zezito Silva
