DILI, 12 agostu 2024 (TATOLI)—Superintendente Servisu Edukasaun Munisipiu Dili, Cesarina Guterres, informa, durante ekipa halo inspesaun ba eskola sira iha Dili laran, nota katak profesór balun falta pontualidade.
“Iha ami-nia monitorizasaun ne’e problema ne’ebé ami identifika mak profesór sira bá eskola la pontuál, ami-nia inspensaun nia hakarak ne’e bainhira iha tuku 7h50 ne’e profesór hotu-hotu iha ona ambiente eskola, nune’e iha tuku 8h00 ne’e prosesu aula la’o normál ona,” Cesarina Guterres hateten iha ninia knaar fatin, Comoro, segunda ne’e.
Notísia relevante : ME hahú rezolve profesór idade reforma no menus profesór
Tanba ne’e, nu’udár inspetór, orienta ona dirijente eskola sira atu reativa lista prezensa ba profesór sira, nune’e profesór sira tama no sai husi eskola bele asina sira-nia naran iha lista prezensa tuir oras.
“Parte inspensaun husu ba diretiva eskola molok tama iha aula asina tiha lista prezensa no sai mós tenke asina nune’e sai evidénsia ida ba sira nia knaar no atividade loron-loron nia ho pontualidad,” nia akresenta.
Nune’e mós, Diretór Eskola Ensinu Báziku 30 de Augusto, Baltazar Boromeu, hateten, nu’udár dirijente eskola sei orienta profesór sira iha eskola atu tama tuir oráriu sira ne’ebé mak fó sai ona iha eskola sira.
“Iha ha’u-nia mandatu agora ha’u orienta profesór sira tenke tama pontualidade maibé tanba foin lalais feriadu ba ezame daruak nian, entaun iha semana ida-ne’e prosesu seidauk la’o másimu entaun profesór sira balun mai tarde. Maibé ita hateten ona ba sira katak ba oin sira tenke tama eskola tuir oras,” Diretór katak.
Daudaun ne’e parte ME prepara ona lista prezensa profesór nia ba kada eskola iha nível eskolaridade.
Jornalista : Osória Marques
Editora : Julia Chatarina
