Projetu merkadu Marco-Cailaco atinje 79%
BOBONARO, 14 agustu 2024 (TATOLI)-Porgresu fíziku iha implemetasaun projetu merkadu Marco, postu administrativu Cailaco, munisípiu Bobonaro daudaun ne’e atinje ona 79%.
Monitorizadór projetu husi kompañia Zavia Unipesoál Lda, Masiel Amaral, esplika daudaun ne’e to’o ona faze taka kalen.
Notísia relevante: IX Governu presiza hadi’ak merkadu Cailaco
“Kalen ne’e hela uma ida mak seidauk hotu, rua konsege hotu ona, hela de’it kakuluk, rua ne’e hotu sira bele cor ona lantai dasar hodi monta batako,” nia ko’alia iha Bobonaro, kuarta ne’e.
Nia dehan, maskr durante implementasaun projetu ne’e hasoru difikuldade balu, maibé ne’e la sai obstákulu ba kompañia Zavia Unipesoál Lda atu finaliza obra ne’e tuir durasaun kontratu ne’ebé iha, tanba hetan apoia husi komunidade no líder komunitária sira iha Cailaco.
“Ha’u-nia badaen-sira mós serbisu ho di’ak, ha’u garante projetu ne’e finaliza iha loron 29 agostu tinan 2024, tanba ami-nia materiál kompletu hotu ona,” nia katak.
Komunidade suku Meligo, Ernesto Maubere, agradese ba Autoridade Munisipál Bobonaro no konsidera ho implementasaun obra ne’e negosiante sira bele halo atividade negósiu iha fatin dignu no seguru.
“Uluk ami haree ba merkadu ida-ne’e aat loos, ami iha Cailaco tempu udan senti ladi’ak, ami halai tún sa’e,” nia hateten.
Enkauntu obra ne’e implementa liuhosi Programa Integradu Dezenvolvimentu Munisipál (PDIM) tinan 2024 ho totál orsamentu $78,863.89 ne’ebé sei entrega ba governu iha loron 29 fulan-setembru 2024.
Notísia relevante: Atu hadi’a kondisaun merkadu Cailaco, kompeténsia iha Governu Sentrál
Jornalista: Sérgio da Cruz
Editór: Evaristo Soares Martins
