CAILACO, 27 jullu 2023 (TATOLI)-Negosiante no autoridade lokál sira rekomenda ba IX Governu Konstitusionál atu tau prioridade hodi hadi’ak merkadu Março, postu administrativu Cailaco, munisípiu Bobonaro, tanba kondisaun infraestrutura maioria ladi’ak ona.
Negosiante Rita dos Santos, informa, merkadu ne’e konstrui dezde tempu okupasaun Indonézia, maibé to’o agora governu seidauk tau prioridade atu rezolve.
Notísia relevante: Atu hadi’a kondisaun merkadu Cailaco, kompeténsia iha Governu Sentrál
“Ami husu Governu hadi’ak netik ami-nia merkadu ne’e, nune’e ami fa’an modo, sé lae ami fa’an ladi’ak, tanba rai modo mós ladi’ak, udan mai ne’e bokon hotu tama laran la di’ak ida, anin mós kalen sira loke-an hodi tanba ai sira dodok hotu ona,” niainforma ba jornalista sira, iha merkadu Março, kinta ne’e.
Nia subliña, atividade negósiu iha merkadu ne’e la’o normál hela kada loron kuarta.
“Basar kuarta ne’e ema barak, maibé loron bailet ne’e ema laiha ida, ami atu fa’an modo de’it mós ladi’ak, merkadu ne’e aat loos ne’e, seguransa mós laiha, animál mós tama arbiru de’it,” nia hateten.
Xefe suku Meligo, Amandio Barreto da Conceição, konfirma problema ne’e hato’o beibeik ona ba autoridade munisípiu Bobonaro liuhosi reuniaun Konsellu Koordenasaun Munisipál atu rezolve liuhosi Programa Dezenvolvimentu Integradu Munisipál (PDIM).
“Ami hato’o tinan-tinan, dehan iha munisípiu sira aprova tiha ona, maibé to’o agora nia rezultadu ami seidauk rona,” nia katak.
Enkuantu merkadu ne’e semanál ne’e akontese iha loron-kuarta ne’e akumula negosiante sira hosi postu administrativu Maliana no Hatulia, munisípiu Ermera.
Notisia relevante: Negosiante merkadu Maliana hetan rendimentu di’ak Iha finadu
Jornalista: Sérgio da Cruz
Editór: Evaristo Soares Martins
