Floresta asegura manu Loriku 30 ne’ebé komunidade fa’an iha kapitál
DILI, 16 Agostu 2024 (TATOLI) – Guarda-floresta munisípiu Dili asegura ona manu Loriku hamutuk 30 ne’ebé populasaun sira ka’er iha munisípiu hodi mai fa’an iha kapitál.
Diretór Nasionál Floresta, Guilhermino Moniz, haktuir katak manu sira ne’e komunidade fa’an iha área Kolmera no leba tuir dalan sira, ne’ebé dauduan asegura ona iha edifísiu Floresta Kolmera, nune’e bele husik filafali ba ai-laran hodi kontinua sira-nia moris.
“Ita apreende manu Loriku sira ne’e, tanba ita-nia maluk sira lori mai fa’an iha Dili. Ita asegura hela depois mak husik filafali ba sira-nia fatin iha ai-laran sira”, Guilhermino Moniz dehan.
Tuir dirijente, manu Loriku ne’ebé komunidade ka’er hodi mai fa’an iha sidade ne’e, barak maka sei ki’ik. “Loloos manu sira hanesan ne’e husik moris iha ai-laran, nune’e bele buka hahán sira natureza nian. Maibé, tanba komunidade laiha koxiénsia, sira ka’er ona, maibé guarda sira halo atividade patrulla la’o ain no hetan sira fa’an hela manu sira ne’e, entaun lori mai asegura iha Floresta nia fatin”, salienta.
Antes ne’e, Floresta halo ona apreensaun ba manu Loriku 40-resin, maibé tanba barak maka mai ho kondisaun moras no sei ki’ik, ikus mai balun mate no hela de’it 30 maka sei moris no agora boot ona.
“Manu sira ne’e guarda sira foti iha meadu Juñu. Fiar katak tempu besik sei husik fali tanba sira bele buka ona hahán rasik”, realsa.
Aleinde ne’e, Floresta mós apreende, iha Jullu, ai-Samtuku kúbiku 26 no ai-Teka metru 1,5, iha Tíbar, ne’ebé komunidade tula husi parte Ermera no Liquiçá tanba laiha karta lisensa no agora asegura hela iha Kolmera.
Diresaun Floresta informa ona ba superiór sira no tuir orientasaun Sekretáriu Estadu Floresta, Fernandino Viera, katak tenke halo lalais prosesu atu ai sira ne’e bele tama iha leilaun, nune’e labele rai kle’ur hodi fohuk tiha.
“Iha ita-nia fatin kuaze ai sunu hanesan ai-Bubur, ai-Dak, ai-Kafé no ai-Sukaer rai kle’ur ona. Ita halo ona prosesu leilaun, maibé komunidade foti uitoan de’it, entaun ai-sunu barak maka fohuk ona”, katak.
Jornalista: Tomé Amado
Editora: Maria Auxiliadora
