Top

PR Horta la tolera no kondena maka’as aktu violénsia hasoru feto iha TL

Prezidente Repúblika, José Ramos Horta. Imajen Tatoli/Egas Cristóvão

DILI, 19 agostu 2024 (TATOLI)- Prezidente Repúblika, José Ramos Horta, kondena maka’as aktu violénsia doméstika ne’ebé ikus-ikus ne’e mosu iha Timor-Leste no nia husu Tribunál tenke foti desizaun sériu hasoru mane ne’ebé halo violénsia hasoru feto.

Xefe Estadu hato’o pozisaun ne’e hodi hatan ba sidadaun mane ida ne’ebé nia video públika maka’as iha media sosiál halo violénsia hasoru feto iha merkadu Taibessi-Dili,semana kotuk.

“Ikus-ikus ne’e violénsia doméstika hahú buras fali ona, loron hira ha’u akompaña iha media sosiál mane ida halo agresaun fíziku hasoru feto ida iha merkadu Taibessi, iha loos ema barak nia oin, maibé sira la halo asaun ruma hasoru ema ne’e, ha’u triste tebes, Tribunál tenke hola medida forte hasoru mane ne’e, nia tenke tama kadeia, labele fó liberdade ba ema hanesan ne’e,” Xefe Estadu hateten ba jornalista sira iha Lecidere Dili, segunda ne’e.

Tuir, Ramos-Horta sidadaun mane ne’e laiha valór morál no etika atu hatudu komportamentu hanesan sarani katólika.

“Atu feto ne’e mak sala mós nia halo ona violénsia hasoru feto ne’e, ida ne’e krime kontra feto, mane ne’e la merese atu hetan liberdade, tenke fó kastigu todan ba nia. Ha’u akompaña atu prosesu ne’e tenke la’o lais, nune’e mane ne’e tama lalais kadeia,” Horta tenik.

Kona-ba kazu ne’ebé akontese semana kotuk iha merkadu Taibessi vítima hato’o ona keixa ba Polísia Sientifiku Invistigasaun Kriminál (PSIK) hodi halo investigasaun.

Suspeitu ne’ebé halo asaun hasoru sidadaun feto ne’e daudaun asegura ona husi Polísia Nasionál Timor-Leste hodi hein prosesu investigasaun.

Entretantu, Lei núneru 7/2010, loron 7 Jullu, ko’alia kona-bá kontra Violénsia Doméstika,  iha Artigu 38 ko’alia momoos katak, hili no halo determinasaun ba pena

  1. Tribunál bele troka pena prizaun ba pena selu multa bainhira tuir presupostu sira hotu ne’ebé hakerek iha artigu 67 husi Kódigu Penál, bainhira iha garantia kona-ba seguransa ba vítima, bainhira agresór hatán hodi tuir tratamentu ka akompañamentu hosi servisu apoiu ba vítima no bainhira ne’e hanesan vantajen hodi mantein unidade familiár.
  2. Arguidu bele mós hetan kondenasaun ba pena asesória hanesan bandu atu kontaktu ho vítima ho períodu másimu tinan tolu, bainhira konsidera katak pena prinsipál la to’o hodi prevene katak aktu hanesan bele akontese.

Notísia relevante:SEI utiliza PAN-VBJ sai polítika nasionál kombate violénsia bazeia ba jéneru 

Jornalista: Hortencio Sanchez

Editór: Florencio Miranda Ximenes

Publisidade

Leave a Reply

Latest Post

error: Content is protected !!