Estudante timoroan iha Filipina levanta kestaun vistu ba Ministru Bendito
DILI, 22 agostu 2024 (TATOLI)–Ministru Negósiu Estranjeiru no Kooperasaun, Bendito dos Santos Freitas, hamutuk ho delegasaun, iha seman ne’e nia laran halo vizita ofisiál bá Manila, Filipina.
Iha vizita ne’e, delegasaun husi Timor-Leste aproveita hasoru malu ho Prezidente Asosiasaun Komunidade Timor iha Filipina, João Kudalai, inklui estudante sira hodi rona preokupasaun sira.
Biban ne’e, Prezidente Asosiasaun Komunidade Timor iha Filipina, João Kudalai, aprezenta kestaun vistu ba estudante timoroan iha Filipina.
“Ha’u ko’alia ho reprezentante estudante timoroan iha Manila-Filipina ne’e importante tebes, hodi rona difikuldade ne’ebé sira hasoru, nune’e bele hato’o ba instiuisaun relevante, liu-liu Ministériu Ensinu Superiór Siénsia no Kultura atu buka solusaun,” Ministru Bendito relata liuhusi nota ne’ebé Agência Tatoli asesu, kinta ne’e.
Notísia reelevante : Timor-Leste no Filipina sei selebra akordu izensaun vistu ba titulár
Nune’e, governante ne’e promete, Governu sei buka solusaun liuhusi kanál diplomátiku, hanesan estabelese nota entendimentu ida ho Governu Filipina liuhusi aplikasaun izensaun vistu.
Antes ne’e, iha loron 24 janeiru 2024, Konsellu Ministru delibera hodi fó podér tomak ba Embaixadór Timor-Leste iha Repúblika Filipina hodi asina akordu izensaun vistu ba titulár sira ho pasaporte diplomátiku no serbisu nian.
Jornalista : Hortencio Sanchez
Editora : Julia Chatarina
