DILI, 26 agostu 2024 (TATOLI)—Preparasaun simu Sekretáriu-Jerál Organizasaun Nasaun Unidu (ONU) iha Arquivo Museu Resistência de Timorense, Instituto Público (AMRT, I.P) atinje ona 90,1%.
“Hela de’it tapete nian mak ami seidauk taka, husi parte zebra-cros nian mai resintu AMRT nian. Entaun, ami atu dehan ami prontu ona atu simu Sekretáriu Jerál nomós ba Horta Show,” Diretór Ezekutivu AMRT, Jorge Alves ‘We Moris’, informa liuhusi diskursu iha ámbitu vizita husi Ministru Prezidénsia Konsellu Ministru, Agio Pereira, iha edifísiu AMRT, Colmera, segunda ne’e.
Nia dehan, AMRT nia espasu auditóriu la to’o nune’e prepara ekran hodi bele fasilita live streaming ba atividade vizita Sekretáriu Jerál ONU.
“Purtantu problema oituan mak auditóriu mak espasu kloot, ne’ebé labele akumula ema to’o 200 no kadeira ne’ebé mak iha 87. Ida-ne’e ba VIP nia. Ba partisipante sei prepara iha li’ur, ami prepara TV haat ho nia medida 85 ins,” nia akresenta.
Notísia relevante : PN sei realiza sesaun solene ba Sekretáriu Jerál ONU
Aleinde ne’e, AMRT mós oferese fatin hodi tau sasán sira ba espozisaun.
“Prepara no oferese hela fatin ba ONU hodi tau nia espozisaun iha andar leten. Ida-ne’e hato’o verbalmente relatóriu ba PCM kona-ba preparasaun ba aniversáriu loron Konsulta Popular ba dala-25. Mak funsionáriu hotu-hotu AMRT nia estrada husi Parlamentu Nasionál oin liu mai UNTL, mai to’o AMRT nian,” nia tenik.
Biban ne’e, PCM halo abertura espozisaun ho nia tema “Dalan ikus ba auto-determinasaun hodi komemorasaun aniversáriu 30 agostu, Konsulta Populár ba dala-25.”
Sekretáriu-Jerál ONU, António Guterres, nia vizita iha ámbitu komemorasaun loron Konsulta Populár ba dala-25, sei partisipa mós programa ‘Horta Show’ ne’ebé sei realiza iha auditóriu AMRT, I.P iha loron 29 agostu, tuku 15:00 to’o 17:00, ne’ebé iha vizita ne’e, sei halo mós abertura ba espozisaun temporária.
Jornalista : Osória Marques
Editora : Julia Chatarina
