BOBONARO, 27 agostu 2024 (TATOLI)-Polísia Nasionál Timor-Leste (PNTL) komandu munisípiu Bobonaro, tersa ne’e realiza enkontru Konsellu Seguransa Munisípiu (KSM) anuál ba daruak ho autoridade munisípiu kona-bá seguransa vizita Papa Francisco iha Timor-Leste.
Enkontru ne’e lema ‘atu halibur informasaun hodi hametin seguransa no estabilidade iha Munisípiu Bobonaro relasiona ho vizita sua Santidade Papa Francisco mai Timor-Leste.
Iha enkontru diskute asuntu seguransa hahú husi bairru, aldeia, suku, postu administrativu mai to’o nível munisípiu atu halibur informasaun no sujestaun oinsá atu garantia seguransa no estabilidade.Notísia relevante: Vizita Papa Francisco, PNTL Bobonaro sei kontrola transporte ho rigorozu
“Ha’u sujere administradór postu ho komandante eskudara sira tenke nota, tenke halo ona estimasaun ba totál pesoas liuliu kareta ne’ebé utiliza hodi tula sarani sira, ida tenke hanoin hodi kalkula, ezemplu karreta ida tula ema na’in hira iha laran, depois ita mós diskute data fiksu atu desloka husi Maliana ba Kaitehu Liquiçá entre data 08 ou 09 setembru inklui mós oras, tanba dia 09 sei iha atividade simu Papa,” nia katak iha enkontru ne’e.
Komandante PNTL Munísipiu Bobonaro, Superientendente Xefe Polísia Agustino Gomes da Silva, hateten PNTL sei fó seguransa ba padre ho madre ne’ebé atu ba hala’o enkontru ho sua Santidade Papa Fransisco iha Dili.
Alende ne’e PNTL sei estabelese postu seguransa rua ba área konsentrasaun perigrimu Munisípiu Bobonaro iha Kaitehu munisípiu Liquiçá hodi garante seguransa ba sarani sira.
“Ita toba iha área karreta tiru PNTL nia, tuir ha’u-nia observasaun fatin di’ak no luan, agora daudaun sira konstrui hela Toilet 80 atu uza,” nia katak.
Biban ne’e, Sekretáriu Autoridade Munisipál Bobonaro ba Asuntu Administrasaun no Finansa, Domingos da Costan,konsidera enkontru ne’e importante tebes atu entidade hotu kontribui ideia atubele garante susesu durante vizita sua Santidade Papa Fransisco mai Timor-Leste.
“Ita garantia vizita Papa ne’e sei lori paz mai ita, tanba ne’e agora ita idak-idak dader-dader tenke hato’o orasaun ba pas tanba vizita amu Papa ne’e bele la’o ho di’ak no paz, presiza ita-nia orasaun,” nia fó hanoin.
Tuir dadus provizoroiu ne’ebé Dioseze Maliana daudaun ne’e rejista peregrinu munisipál Bobonaro ne’ebé atu partisipa iha misa ne’e hamutuk rihun rua-resin.
Notísia relevante: Sarani Bobonaro rihun 20 sei partisipa misa iha Tasi-Tolu
Jornalista: Sérgio da Cruz
Editór: Evaristo Soares Martins
