PR Horta husu Governu promove tais Timor iha mundu
DILI, 27 agostu 2024 (TATOLI)- Prezidente Repúblika (PR), José Ramos Horta husu ba Governu liuliu Ministériu Turizmu Komérsiu no Indústria atu halo promosaun ba tais Timor iha Singapura, Japaun, Europa nune’e ema bele hatene no koñese.
“Inisiativa tais ohin ho grupu feto ne’ebé halo tais di’ak tebe-tebes, Embaixada lubuk ida, Prezidensia Repúblika mós sosa lubuk ida, hanoin Prezidensia Repúblika mak gasta bo’ot liu ba tais, kuaze loro-loron delegasaun oi-oin mai ne’e lori tais, mortel, kafé barak loos. Governu tenke halo promosaun ba ita nia tais atu ema rai-seluk bele hatene no koñese,” Horta hateten ba jornalista sira iha Palásiu Prezidensiál Dili, tersa ne’e.
Atu promove tais foin lalais Palásiu Prezidensiál realiza expozisaun tais no daudaun ne’e sosa tan atu tau iha salaun laran Palásiu Prezidensiál hodi hein vizita Papa Francisco ne’ebé tuir ajenda sei hasoru mós Prezidente Repúblika.
Iha fatin hanesan, Jestora ba Programa Kultura hosi Timor Aid, Felicidade Coreia informa, UN Women ho Timor Aid hamutuk ho asosiasaun Rede soru na’in realiza feira kona-ba soru tais ho produtu seluk hodi komemora loron Konsulta Populár 30 Agostu.
“Ohin loron ami halo atividade ida kona-ba hasoru, soru na’in sira no mós halo feira kona-ba tais no produtu sira seluk, ne’ebé halo hosi tais iha ligasaun ho tais, atividade ohin loron ne’e atu haree liu kona-ba selebra tinan 25 konsulta popular nian, ne’eduni atividade ida ne’e hahú ohin loron 27 to’o 29, iha Farol Dili,” dehan nia.
Soru na’in sira ne’e hamahan-an iha asosiasaun Rede Soru na’in Timor-Leste, no daudaun ne’e soru na’in sira estabelese ona rede soru na’in iha Munisipiu 11 no Munisipiu rua mak seidauk.
Entretantu, Diretora Ezekutivu Timor Aid, Maria do Ceu Lopes da Silva, informa, eventu soru ne’e hahú harii iha tinan 2019 to’o agora, foufoun harii iha Oé-Cusse no Covalima, no ba fali iha Bobonaro no Lautem.
Iha tinan 2023 ho situasaun Covid-19, tanba ne’e para tiha oituan depois kontinua fali iha Baucau ho Viqueque no agora 2024 ba Manatuto, Liquiça, Manufahi no Ainaro hela de’it Dili, Aileu no Ataúro.
“Asosiasaun ne’e rejistu ona iha Ministériu Justisa, no iha loza ida iha Pateo ba sira nia empoderamentu ekonómiku UN WOMEN mak finansia,Tanba loron ohin ita selebra konsulta popular, entaun ami mós aproveita halo eventu ida ne’e, tanba tais mak ita nia identidade kultura Nasionál ka simbólu nasaun ne’e mak ami hodi tais mai iha ne’e ho rede soru na’in sira, nune’e Prezidente Repúblika dada Embaixadór sira mai haree ita nia tais,”nia afirma,
Nia hatutan, atividade ne’e apoiu orsamentu husi UN WOMEN entrega ba Timor Aid no Timor Aid implementa tuir kontratu, no orsamentu ne’ebé apoiu ba Rede soru nain iha tinan rua nia laran hamutuk rihun $300.
Xefe UN Women iha Timor Leste, Amy Nishtha Satyam hato’o agradese ba parte hotu ne’ebé mai hamutuk hodi halo lansamentu feira tais iha Farol Dili.
“Ami kontente tebes atu haree uluk Prezidente Repúblika ne’ebé onradu hodi halo lasamentu ba projetu ne’e,” nia tenik.
Dezde tinan 2018 feto sira iha parseria ho fundasaun ida halo ona investimentu signifikativu hodi hasa’e feto sira nia partisipasaun ekonómika.
Jornalista: Hortencio Sanchez
Editór: Florencio Miranda Ximenes
