DILI, 03 Setembru 2024 (TATOLI) – Ministru Agrikultura, Pekuária, Peska no Floresta (MAPPF), Marcos da Cruz, orienta dirijente sira atu jere di’ak ekipamentu agríkola ne’ebé ministériu distribui ba munisípiu sira atu labele uza de’it iha to’os ho natar sira, maibé tenke apoia mós ba atividade sira seluk.
“Jere didi’ak ekipamentu tratór médiu no hands tractor ne’ebé ita distribui ona ba munisípiu sira ne’e atu utiliza ho didi’ak. Ita lakohi mákina ne’ebé ita distribui ne’e hela de’it iha fatin ida de’it, maibé bele apoiu mós ba atividade seluk hanesan iha área pekuária”, ministru hateten ba dirijente sira iha salaun enkontru Ministériu Agrikultura, Comoro, ohin.
Tuir nia, iha sentru Dotik daudaun ne’e presiza hela eskavadora ida atu fila rai hodi bele kuda animál nia hahán, tanba iha Dotik du’ut tarak moris buras loos no difísil atu tesi, tanba ne’e presiza ekipamentu atu fila rai.
Nia husu atu eskavadora ne’e bele kee debu atu komunidade ne’ebé haki’ak karau ne’e bele hetan bee sufisiente, nune’e tempu udan mai fatin ne’e bele konserva bee. Aleinde ne’e, populasaun iha Dotik mós husu ministériu atu apoia ekipamentu hodi loke dalan atu sira bele asesu bá to’os.
“Daudaun ne’e sira atu halo to’os, maibé du’ut tarak barak liu, tan ne’e sira-nia to’os to’o agora abandona hela”, salienta.
Ministru solisita ba responsavel sira bainhira orienta ona operadór sira bá apoia serbisu iha sentru Dotik hodi fila rai no kee debu ba karau metan sira, inklui loke dalan ba komunidade sira-nia to’os, tenke trata mós operadór sira-nia nesesidade atu sira bele serbisu ho responsabilidade.
Diretór-Jeral Pekuária no Veterinária, Carlos António Amaral, admite katak sentru Dotik presiza ekipamentu atu fila rai, tanba ne’e nia sei halo esforsu hodi organiza ho diresaun agrikultura nasionál no munisipál atu hetan apoiu ekipamentu sira hodi aselera serbisu iha sentru Dotik.
“Ita konsidera preokupasaun ministru nian pertinente tebes, tanba ne’e ita sei organiza asuntu ne’e atu hetan apoiu husi parte Diresaun Agrikultura nasionál no munisipál hodi bele orienta operadór sira fila mós rai iha sentru Dotik atu ita bele aselera kuda ai-han ba animál sira”, dehan.
Rekorde katak Banku Mundiál disponibiliza, foin lalais ne’e, ekipamente agríkola unidade 164 no MAPPF sosa tratór 25 atu apoia ba grupu agrikultór sira iha munisípiu atu hasa’e produsaun agríkola. Materiál sira ne’e mak tratór boot, hands tractor, mákina kuda no ko’a hare.
Notísia relevante: Fahi 25 mak mate iha sentru Dotik
Jornalista: Tomé Amado
Editora: Maria Auxiliadora
