DILI, 05 setembru 2024 (TATOLI)–Negosiante sira iha Rotunda Comoro lamenta ho asaun fízika no apreensaun ba sasan vendedór sira-nian ne’ebé la dignu iha loron 03 setembru 2024, ne’ebé hala’o husi ekipa konjunta Sekretáriu Estadu Asuntu Toponímia no Organizasaun Urbana (SEATOU).
Notísia Relevante: PR Horta kondena maka’as SEATOU halo atuasaun agresivu hasoru negosiánte ambulante
Vendedór no vítima ba asaun agresivu ne’e, Cirilio Soares, haktuir kronolojia katak derrepente de’it ekipa konjunta SEATOU to’o iha fatin sira faan ba ne’e, hodi baku sira no hadau-estraga sasán ne’ebé sira faan.
“Ha’u ko’alia ba sira, ami-nia moris mak ne’e maun, bele baku sasán sira maibé labele baku ami ho besi. Entaun, sira langsung mai ha’u, kaer ha’u-nia faru gola, hamonu ha’u no sama ha’u. Sira baku ema vendedór sira seluk ho besi. Ami sente atuasaun ne’e ladi’ak ba ami negosiante ambulante dalan ninin,” nia hateten liuhsi konferénsia imprensa, iha Vila Verde.
Bainhira membru ekipa SEATOU baku nia, nia dehan, nia maun ida sori-netik hodi hateten ba sira katak atu foti sasán karik bele foti ba maibé labele baku nia, nune’e membru hirak ne’e baku maun ne’e ho besi-kanu ida iha nia kotuk laran ne’e, hodi rezulta nia kotuk laran ne’e metan hotu.
Nia dehan, merkadu Taibesi laiha fatin no kondisaun atu sira faan iha ne’ebá tanba sasán sira-ne’ebé sira faan ne’e la folin.
“Ami faan loron rua ka tolu dalaruma ema la sosa. Fatin sira tau ema ba iha ne’ebá modo ema la sosa to’o dodok, tanba fila sai ba faan iha li’ur. Merkadu Maneleuana la sufisiente, ita gasta atu halo saida,” nia dehan.
Ami hetan notifikasaun no hakarak koopera no sira buka fatin ba negosiante sira iha Kampung Baru ne’e atu muda, maibé to’o agora buat ida laiha.
Vendedor Marçal da Costa Soares haktuir, ekipa SEATOU nian to’o ba halo apreensaun ba iha sira-nia sasán, entaun sira defende aan atu salva sira-nia sasán maibé ekipa ne’e atua ho agresaun no kaer negosiante sira ba iha polísia nia edifisiu.
“Ami maluk feto na’in-rua mak hela iha sala detensaun, sira haruka ha’u fila ba halo tratamentu tanba sira baku liman bubu hotu no kotuk laran metan hotu. Seguransa SEATOU mak baku, ha’u nia kotuk laran ne’e metan hotu,. Ami husu polisia sira, tanba sira baku ami, imi hare de’i. Ami defende ami-nia aan, imi kaer mak ami. Ida-ne’e mak ami ba to’o polísia. Sira ko’alia de’it karik ami fila de’it, maibé baku ami ne’e mak ami defende ami-nia aan,” nia haktuir.
Vitima sei aprezenta keixa ba Ministériu Públiku
Iha fatin hanesan, Jerente Fundasaun Maubere Advocacia (FMA), Constantino de Jesus, hateten, fundasaun sei tulun vitima sira hodi aprezenta keixa kontra Autoridade Estadu, tanba viola vendedór sira-nia direitu ho apreensaun sasán no asaun krime.
Nia garante, sei aprezenta keixa iha loron 15 nia laran ba iha Ministériu Públiku (MP) no Tribuanl, tanba sei halo verifikasaun no kontaktu ba vitima sira hotu.
“Ita presiza halo ezaminasaun juridika ida ba desizaun administrativa ba SEATOU, tanba viola direitu ba moris no dignidade ema-nian. Entaun, sidadaun hotu aprezenta keixa perante orgaun judisiariu,” Jerente Fundasaun Maubere Advocacia (FMA), Constantino de Jesus, hatten ba jornalista sira liuhusi konferénsia imprensa.
Nia parte sei aprezenta mós keixa kriminál ida ba iha MP, tanba Polísia Nasionál Timor-Leste la simu keixa kona-ba ekipa SEATOU baku vitima sira iha loron rua liuba.
“Akontesimentu horibainrua, vitima rasik hato’o keixa ba Polisia maibé polísia rejeita no duni nia husi sala keixa nian. Ida-ne’e hatudu polísia la kompreende saida mak hakerek iha Kódigu Penál. Ita hakarak promove asaun kriminál ba iha MP. Ita mós sei halo keixa sivil ida ba apreensaun sasán,” nia hateten.
Nia esplika, vítima hakarak lia-loos ba asaun krime ne’ebé nia hasoru maibé polísia rasik rejeita, tanba ne’e mak kazu sei aprezenta diretamentu ba iha MP.
Notísia Relevante: Opozisaun husu SEATOU trata negosiante ambulante ho dignu
Jornalista : Jesuína Xavier
Editór : Cancio Ximenes
