DILI, 05 setembru 2024 (TATOLI)—Prezidente Repúblika (PR), José Ramos Horta, apela ba autoridade seguransa sira hanesan Polísia Nasionál Timor-Leste (PNTL) atu labele impede liberdade jornalista iha terrenu.
“Ha’u hateten ba PNTL, favór ida, rai ida demokrátiku, imi-nia serbisu tenke evita no halo atuasaun mak ba grupu violénsia. Ha’u aviza kedas ba Komandante Jerál PNTL, ha’u lakohi book tan liberdade jornalista sira-nian,” PR Horta hateten iha resintu Palásiu Prezidensiál, Bairru-Pité, kinta ne’e.
Iha sorin seluk, Primeiru Ministru (PM), Kay Rala Xanana Gusmão, konfesa katak nia parte seidauk simu informasaun kona-ba membru PNTL impede serbisu jornalista iha terrenu.
“Ha’u la hatene no seidauk rona, imi ba hasai tiha ona, ha’u haree tiha ona, Prezidente Repúblika mak hatudu video ne’e,” Xefe Governu katak.
Nune’e mós, Sekretáriu Estadu Komunikasaun Sosiál, Expedito Loro Dias, sente lamentável ho atuasaun husi autoridade seguransa sira ne’ebé konsideradu ladún respeita knaar jornalista sira bainhira halo kobertura.
“Tanba dala barak jornalista halo atividade kobertura iha terrenu iha dadeer to’o kalan. Agora ita-nia jornalista bainhira halo kobertura iha Comoro, ida-ne’e ba ha’u hanesan dezentendementu oituan entre jornalista ho parte seguransa. Maibé ha’u mós husu ba jornalista sira, bainhira kobertura iha dadeer no kalan tenke tau id card ho kartaun profisionál ne’ebé Konsellu Imprensa oferese ona, nune’e parte seguransa bele hatene tanba jornalista barak, nune’e labele hamosu dezentendimentu,” nia tenik.
Notísia relevante : AJTL husu labele ameasa jornalista iha kobertura maibé respeita
Sekretáriu Estadu dehan, autoridade seguransa no jornalista iha nia papel importante hotu, tanba ne’e presiza respeita malu iha ida-idak nia atividade iha terrenu.
“Maibé loloos ne’e bainhira jornalista aprezenta ona id card, la presiza lori bá Polísia nia fatin hodi halo indentifikasaun maibé seguransa nafatin deskonfia. Jornalista Suzana no Antoneta husi Diligente, ha’u ko’alia ho sira no lori Governu nia naran ha’u husu tiha deskulpa ona ba sira. Maibé, ha’u husu ba sira na’in-rua bainhira atu halo kobertura iha terrenu tenke uza id card,” governante ne’e salienta.
Aleinde ne’e, Expedito hato’o ona ba Ministériu Interiór no nia sei hato’o ba ekipa seguransa iha terrenu ne’ebé akompaña ekipa konjunta ne’ebé lidera husi Sekretariu Esatdu Asuntu Toponímia no Organizasaun Urbana (SEATOU) nia serbisu organiza sidade.
“Tanba ne’e, ba oin husu jornalista atu respeita mós parte seguransa, hanesan mós kolega seguransa tenke respeita atividade jornalista nian,” nia fó hanoin.
Jornalista : Osória Marques
Editora : Julia Chatarina
