DILI, 07 setembru 2024 (TATOLI) – Komandante PNTL Munisípiu Dili, Superintendente Xefe Polísia, Orlando Gomes, hateten Komandu PNTL foti ona medida no halo ona suspensaun ba oknum polísia AC ne’ebé lanu iha fatin Karoke hodi fó pistola ba ema sivil ka’er.
“Membru ne’ebé entrega nia arma ba fali ema sivil ka’er ne’e, momentu ne’ebá kedan ita dezarma kedan nia no foti kedan nia pistola. Komandu Polísia Nasionál Timor-Leste deside ona hodi halo suspensaun ba ita-nia oknum refere”, Orlando Gomes, hateten ba jornalista sira iha Ministériu Administrasaun Estatál, Caicoli, sábadu, ohin.
Nia dehan, oknum PNTL ho inisiál AC, atualmente, la halo nia atividade hanesan membru polísia tanba hetan ona suspensaun husi Komandu PNTL.
“Relatóriu ba kazu ida-ne’e, husi investigadór sira konklui ona no enkamiña ona ba Komandu Jerál PNTL. Agora daudaun Sua Eselénsia Komandante Jerál PNTL despaisa ona ba Departamentu Justisa Disipliña Komandu Jerál atu kontinua loke prosesu ne’e”nia konklui.
Oknum PNTL ida lanu entrega fali nia pistola ba ema sivil
Jornalista:Natalino Costa
Editór : Zezito Silva
