DILI, 09 setembru 2024 (TATOLI)—Konferénsia Episkopál Timorense (CET, sigla protugés), sesta (12 abríl 2024), ofisialmente anúnsia vizita pastorál Papa Francisco mai Timor-Leste ne´ebé maiória Katólika ho populasaun maizumenus 96% ne´e iha 09-11 setembru 2024.
Tuir portál ofisial Vatican News haktuir, Papa Francisco sei hala’o nia vizita pastorál iha Indonézia, Papua Novaguine, Timor-Leste no Singapura hahú husi 02-13 setembru 2024.
Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei voo husi Roma iha 02 setembru 2024 no sei fila-fali ba Roma iha 13 setembru 2024.
Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’o 06 setembru 2024. Populasaun Indonézia maioria Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%
Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.
Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú husi 09-11 setembru 2024. Timor-Leste maiória relijiaun Katólika ho populasaun 96% ka ema hamutuk juta ida.
Hafoin ne´e, Papa Francisco sei vizita Singapura durante loron tolu hahú hosi 11-13 setembru 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.
Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.
Kardeál Pietro Parolin la envolve iha delegasaun Papa Francisco
Iha Papa Francisco nia vizita Estadu no pastorál iha Asia no Oseania ne’e, Kardeál Pietro Parolin, ema segunda homem iha vatikanu, no Sekretáriu Estadu Vatikanu, la partisipa iha viajen no vizita pastorál ne’e.
Tansá? Kardeál Pietro Parolin tenke fila ba Italia tanba ninia inan mate ho idade 96. Parolin hili liu akompaña ninia família durante tempu ka loron tristeza ne’e, nune’e nia lakonsege akompaña Papa Francisco nia viajen ka vizita pastorál naruk iha Asia no Oseania.
Ho nune’e, lista delegasaun Papa Francisco nian tenke hetan mudansa boot, tanba kardeál ida-de’it mak akompaña Papa Francisco mak Kardeál Luis António Tagle, misonáriu husi Filipina ne’ebé koñesidu hanesan figura importante iha Vatikanu.
Aleinde Prolin, iha mós figura importante seluk ne’ebé la tuir iha delegasaun iha viajen naruk ne’e mak inklui Kardeál Miguel Angel Ayuso, tanba de’it kondisaun saúde. Kardeál Kurt Koch ne’ebé toma konta ba relasaun eukumenis mós la tuir delegasaun Papa Francisco nian. Iha viajen ba Mongolia ne’e, iha kardeál na’in-lima (5) maibé Papa nia viajen ba Indonézia, Papua Neovaguine, Timor-Leste no Singapura ne’e, lista delegasaun Papa nian ne’e kiik-liu.
Delegasaun Vatikanu
Maske nune’e, Papa Francisco sei akompaña husi figura importante seluk husi Vatikanu mak hanesan; Jesuit António Spadaro, hanesan vise-sekretáriu asuntu Edukasaun no Kultura iha Vatikanu.
Aleinde ne’e, Papa Francisco mós akompañadu husi sekretáriu privadu Fabio Salerno no Daniel Pellizzon, ne’ebé ralativu idade kiik-liu ho entidade kurial Vatikanu sira seluk,
Fabio Salerno servisu hamutuk ho Papa Francisco hahú husi tinan 2020. Aleinde ne’e, Daniel Pellizzon foin daudaun mak sai sekretáriu privadu ba Papa Francisco nian iha tinan 2023 liubá ne’e. Pellizzon mai husi Argentina. Antes servisu iha Vatikanu, nia servisu iha parokia ida iha Buenos Aires, iha sidade Papa Francisco nia moris fatin.
Viajen ida-ne’e tada ida husi mudansa signifikante iha dinamika ekipa Papa Francisco, liuliu prezensa Daniele Cherubini sai hanesan Xefe Ajudante foun iha Vatikanu.
Maske nune’e, delegasaun Papa Francisco nian ne’e liuliu sua Santidade Papa Francisco haksolok nafatin kumpre oráriu vizita pastorál iha Asia no Oseania.
Delegasaun ne’e hala’o viajen husi Roma ho destinasaun fatin iha Indonézia, Papua Novaguine. Timor-Leste no Singapura hahú husi loorn 02-13 setembru 2024 ne’ebé sei mai.
TATOLI
